مممممم

لي فترة ما كتبت مدري مالي خلق اكتب واليوم جاتني نفس اكتب بس مدري اش اكتب ههههههه
الحر شديد طبعاً ..اليوم قررت انضف المخزن بعد ما خلصت آخر طلبية شنطة عندي ان شالله انزلها لكم نفس الشنطة الي على شكل مربعات بس قماش غير
نضفت ربع المخزن وراح اكمل بكرة وتوقفت لأني فطست من الحر..
دي الغرفة تغبر مرة بسرعه وتنرفزني الغبرة قد ما انضف فيها احس الغبرة تدخل تراب مو غبار راح انضفها كلها وامسك الشبابيك والصقها كلها على امل ما تدخل غبرة مرة تانية
الزرع مسكين كمان يعاني مع الحر ما يمر يومين الا هو نشف مع انه المفروض ينسقى مرتين بس بالسبوع بس صرله جفاف مع الحر صرت اسقيه اكثر
وبس

القمر

صور عزوز بالثوب والدقلة في الوحدة الصحراوية وهو رايح روضته أو تمهيديته بالأصح هههههه ماشالله عليه الله يحميه ويحفظه حبيبي

أمي في صفي

هذا الأسبوع كنت مرة مرة مشغولة ما بين دكتور الأسنان وطلبات مدرسة عزوز وذهابي معه اليوم راح أحكيلكم بالتفصيل
أول شي طلبوا انه الأطفال يوم الأحد يلبسوا شي يلائم البيئة الصحراوية زي ثوب وشماغ يلبسوه بلثمه أو بشت لبست عزوز دقلة وثوب وشماغ والله صورته بس من الذكاء صورت والكاميرا ما فيها ذاكرة فتيسفت بالكاميرا ومش عارفة انزلها كيف يبغالي اشفلي اذا ينفع معاها سلك ينزل الصور ..المهم طلبوا ان الأولاد يلبسوا هاللبس 3 أيام لغاية يعني نهاية الوحده لكن عزوز ما قلي لأنصه اصلاً اتضايق من قبة الثوب والدقلة وهو لابسها طول اليوم فلما رحت اليوم ما كان لابس والبنات طلبوا منهم يلبسوا جلابيات أو فساتين شعبية بدوية
الشي الثاني طلبوا من الأمهات يحضروا من أبناءهم يوم الإثنين وكل أم لها وقت 10 دقايق تقدم فيه شئ لأولاد الصف مثلاً عمل فني أو تحكيلهم قصة أو تلعبهم لعبة حتى لو تنشد معاهم أنشودة ..أختكم في الله أختارت طبعاً العمل الفني وسويتلهم عمل اذا تتذكروه زمان من موقع ماكينغ فريندز..إلى في شخصية طفل يقوموا بتلبيسه كان في بوست روضة بيتية..راح أحطلكم رابط الموقع للإفادة
http://www.makingfriends.com/f_Friends.htm

وسويت مكعبين فيه قطع الملابس كل واحد يرمي المكعب وعلى حسب الي يطلعله يلبس الدمية
مرررة انبسطوا وعجبتهم الفكرة حتى المدرسات انبسطوا وسألوني كيف سويتها رغم كل الي سويته اني طبعتها وقصيت ..بس والله أخدت وقت وأنا اقص بس الحمد لله عجبتهم مرة وأخدوا اسم الموقع كمان هههههه
بعدها قضيت اليوم كامل مع عزوز في صفه اشوف كيف يدرسوهم اش يعطوهم وكان يوم ممتع بكل ما فيه اعجبتني بعض الأفكار في تعليم الرياضيات وكيف ان المدرسة ما تعطي لأي طفل أي شئ إذا ما انتظم بالصف مثل الباقيين ..
آخر الدوام سألتهم اذا أقدر أصور الأطفال ما مانعوا ولو كنت ادري كان اشتغلت تصوير من اول الدوام بس كنت خايفة يقولوا شي لأنه في لوحة عند البا ب ممنوع التصوير لكن صورت كم صورة لأصحاب وصاحبات عزوز المفضلين

وهدول أصحابه الأولاد ...أزعجني الولد دا وهو يلوح بالدفتر حقه ما طلع وشه هههههه

آخر شي صورت صديقته وحاولت ابين ركن الثلج الي ورا ..لأنهم كانو عاملين ركن صحراوي وركن ثلجي

تعالوا تعالوا

الله يحييكم على الغدا ...دي الصينية بس قبل الدخول في الفرن أما بعد فنسيت اصوره طبعاً كان كل شي مقمر ومحمر ومقرمش من بره وطري ولزيز من جوه هههههههه
طبعا مع رز ابيض مفلفل
وفلفل حار
دي طبخة قبل كم يوم

الجمعه الي فاتت حبوا الأولاد يطلعوا الحوش ..هم كل اسبوع بيطلعوا بس الحر بيزيد وما نقدر نقلهم لا لأنها بسطتهم بس ودي اقلهم لا لأنه حرررر..وكان شرطنا لهم الي يبا يطلع الحوش ينام الضهر (علشان يهجدوا)واتسدحوا الي نام نام والي مسوي نفسه نايم والي حاول ينام والي نام بعد ما قاموا البزورة ههههه والي ما نام اصلا شوفو الصورة ههههه الله يسعدهم يارب

اخيراً خلصت شنطة

خلصت اول شنطة من الشنط الي قلتلكم عليها هي زي الشنطة الصغيرة الي وريتكم هي بس على أكبر على حسب الي طالبتها بس ما عجبتني سودة وبيضا لحالها أحب الألوان فحطيتلها وردة والوردة ممكن تنشال إذا ما عجبت صاحبة الشنطة..اش رأيكم؟
دحين راح ابدأ في الطلب الثاني انشالله وانتظروني..

مجرد ثرثرة

تتزكروا صور زمان ..؟؟
لما اقعد اتفرج على صوري وانا صغيرة مرة شكلي كان يضحك يا شعر منكوش يابجامه لونها عجيب يا نضارة اكبر من وجهي نفسي ههههه وأظن كتير ناس لهم صور زي كده عجيبة في الطفولة
ولاحظت كمان انه الملامح واللبس والمظهر العام في السنين الي بعدها ايام المتوسط والثانوي في مرحلة البلوغ تكون الأشكال تحفففففة خاصة لما البنات يحسبوا نفسهم كبروا ويلبسوا ملابس ما تركب عليهم ولا حللقان كبيييرة هههه
خلاصة الكلام اكتشفت انه المرأة عموماً كل ما تكبر تحلو احم احم ...من جد حتى الممثلين اذا لاحظتوا اشكالهم وهم صغار مرة وفي مرحلة المراهقة مرة شكلهم عجيب بس اول ما يبدأوايصيروا على 30 يحلووا
_______________
ودي أقص شعري قصييييييييييير هو قصير حالياً بس نفسي اجازف بفرنسي مثلاً ..تعجبني دي القصات مع هايلايت يطلع حلو شكلي حغامر مرة واسويه مو مشكلة شعر وحيطول ;)
_________________
قربت اخلص وحده من الشنط المطلوبة للبيع وراح اعرض الصورة ان شالله قريباً..
__________________-
حبيبي عزوز مريض له كم يوم مسخن وطلع عنده التهاب لوز الحمد لله اليوم خفت السخونة كتييير وبدأ يفوق شوية من الرمية الي كان مرميها..تخيلوا الدكتور الي رحناله على الساعه 7 بعد المغرب كان عنده 25 ملف قبلنا ياساااااااتر كلهم دول اطفال تعبانين طبعاً ما قعدنا حولنا على دكتور تاني برضه عنده مجموعه بس مو زي التاني
_________________________
مشتهية فوتتشيني

اذا خرب شي يخرب وراه سبعين شي

قدأضطر للإنقطاع عن عالم النت لمده لااعلم ما هي المدة لعدة اسباب: أول شي كنت بحمل المسنجر الجديد وقعد يحمل سنة مع انه النت كان سريع ولما انتهى التحميل قلي فشل التحميل عدته كم مرة كل مرة يفشل طفشني وقلتله خلاص كانسل بطلت ما ابا قام مسح المسنجر بكبره مرة وحده ولي كم يوم ابا احمله مرة تانية ولسه ما حملته
ثانياً: المصيبة الأعظم ان شاشة لاب توبي قاعد تروح فيها انا بكتب دحين والوان الشاشة اخضر في احمر في وردي وكل ما احد قرب جنبي سويت اعصار عشان اقل دقة تخلي الشاشة سودة مرة وحده والكلام مهزوز كأنها تلفزيون اثري
ثالثاً:جهازي صاير يعلق ولأنه عمري ما فرمته من يوم ما اشتريته من 3 سنين فخلاص يبا يشتكي الهجاج وانا ما احب الفرمتة لأنها تمسح اشياء حتى لو حرصت اني انقل كل الأشياء الي بجهازي
رابعاً:اصابتني حالة الكآبة وقاعدة اضارب دبان جهي وورايا تنضيف بس مالي خلق
خامساً:بكرة عندي موعد اسنان وتليه عدة جلسات لأنه واحد في خراج والتاني مسوس
سادساً :في اشياء اخرى ولكن اكتفي بهذا القدر علشان لا تشردوا من مدونتي اشعر بالطفش والكآبة حالياً والحمد لله على كل حال

حديقة صغنطوطة

كنت ومازلت نفسي يكون عندي حوش عشان ازرع فيه وإلى ان يحين هذا الوقت جبتلي زرعيتن الي في الصور فوق عشان يصير عندي ركن مزروع في بيتي ..الصراحه ما اعرف اسامي هادي الزرعات بس عجبوني مرة وودي اسوي بحث عنهم عشان اعرف اش هم وواقرأ معلومات عنهم بس مني عارفة كيف ابحث عن الزرعه بالصورة ؟؟؟ الي يعرف يقلي

we back

عدنا بعد ما خلصت الإجازة حمد لله انبسطنا فيها جات خالاتي وبناتها ..وبكرة نرجع للمدرسة والصحيان بدري حالياً بشتغل على كذا شنطة بس ما خلصت ولا واحده منهم كلها موديلات تعرفوها بس اختلاف في الألوان والحجم طبعاً على حسب الطلبية ان شالله كل ما اخلص وحده بحطها موضة الشنط دحين الشنط الكبيرة ...بفكر اعمل شنط كبيرة وبفكر اعمل ابواك الي تجي على شكل شنطة صغيرة ان شالله في الخطة الخمسية بعد ما اخلص الي عندي وبما اني سرت احب اللمسات اليابانية ممكن اضيفها للشنط خاصة انه فيه شي ياباني في الموضة شي حواجب يابانية وشي غرة يابانية بفكر اسوي شنطة يابانية ههههههههههه قصدي قماشها ياباني