Thursday, July 31, 2008

حفلة تنظيف وترتيب

دي الفكرة شفتها في واحده من المنتديات وعجبتني دي حديدة علاقة ملابس بس ثبتت عليها صاحبة الموضوع اغطية القدور
من بداية دا الأسبوع قرأت موضوع لوحده في النت نظفت بيتها كله ..

القصة انها كان عندها شغاله معتمده عليها بالتنظيف اكثر شي وسافرت الشغالة واتكركب الوضع عليها وعندها بنت وولد بالمدرسة ومرة من المرات جات صديقتها عندها وصار شي اضطروا انهم يدفوا دولاب واكتشفت انواع الوساخة تحته واتفشلت وصديقتها هادي تمون عليها ..قررت انها تمسك البيت غرفة غرفة وتبدأ تنظف بذمة خاصة انها اعتمدت على الشغالة واهملت كثير في البيت فكانت حتى الملابس تطلع اقرب لبس وتلبسه وملابس اولادها نفس الشي حتى ما تكوي واهملت واهملت لين خلاص هي طفشت من نفسها ومن الغبرة والقرف وصديقتها قعدت تنصحها وتكلمها وتقول مايصير كده المهم اتفقوا من تاني يوم يبدأو حفلة التنظيف اليوم الأول قعدوا 5 ساعات طبعاً تنظيف حتى للجدران والمراوح وتحت الكنب والدولاب وكل دولاب اتنكت واترتب الي ماله داعي اترمى والي له داعي اترتب واتنظم ..
أختكم بالله اتحمست وقلت خليني ابدأ حفلة نظافة يعني مو التنظيف العادي لا اكثر..
بدأت بالمطبخ وما ادراكم ما المطبخ فتحت دولاب القهوة والشاهي والبساكيت والشوابير(جمع شابورة ههه)رميت الي منتهي مدته والي محطوط في اكياس زي المكسرات او محطوط في كراتين فضيته وحطيته في تبرويرات عشان يترتب وما ياخد مساحه خاصة اني لقيت كذا كيس من المكسرات فجمعتهم كلهم بعلبة واحده بدل الكركبة بعدين دولاب الصحون والقدور كلهم طلعتهم ومسحت الدولاب ورجعتهم

أما الفرن آآآه من الفرن انا طول عمري اغسله بطريقة عادي عمري ما انتبهت للأركان والزيت الي بيتجمع حولين مكان صمام فتح الغاز قد ما انظف فيهم ما يطلعوا قلت خليني اجرب بالسكينة حكيت الحواف وطلعت الدهون اللاصقة زي الخيط وقرفت مرة المهم جبت جف لإزاله الدهون بعد ما حكيت الأطراف وصمام فتح الغاز وغرقته وبالسلك حكيت ....والله صار ابيييييييييض يلق انا لسه ما خلصته بس حمستني النتيجة اكمل لأني امسك كل يوم كم دولاب بس والله الفرن كأنه جديد كل شوية اطالع فيه أهم شي بعد القلي نمسح اطراف الفرن لأننا ما ننتبه لدي المناطق


انشالله اذا خلصت المطبخ ببدأ بغرفة النوم في فكرة عجبتني لتطبيق البديات او التيشرتات عشان لاتكركبي الدولاب شوفوها في الصورة
يالله اشوفكم على خير

Sunday, July 27, 2008

لمسات

غرفة اولادي عملت فيها اشياء كثيرة وكانت اول تجربة طلاء على جدار فيها وكانت النتيجة لابأس بها
أمس اضفت لمسات بسيطة عجبت الأولاد شوفوها في الصور
ودا الجدار التاني

Wednesday, July 23, 2008

جسر التواصل مع الله


قرب شهر رمضان وجا وقته في نص الإجازة السنوية كتير ناس قالوا مو حلو في الإجازة بالنسبة لي ..ماتفرق المهم جاتني فكرة حلوة وقلت اشارككم بيها ممكن تستفيدوا منها وتآخدو الأجر والثواب مع حلول رمضان المبارك تعرفوا في ناس كتير مساكين وفقراء وممكن دا الوقت الي عنده شي زايد ..ملابس ما يحتاجها..العاب اطفال ما صاروا يلعبوا بيها..ملابس شتاء بطانيات..اي شي أهم شي يكون نظيف ومرتب لأن بعض الناس الله يهديهم يتصدقوا بملابس مقطعه ووسخة بعضها ما تنفع حتى خرقة حرام عليهم هدول برضوا ناس ولا عشان ما عندهم ..الفكرة الي ابغا اقلكم عليها هيا انه مثلا كل واحد يجمع الي عنده ملابس مثلاً يمسكها يفندها الي مقطع يرميه ولا يسويه خرق والي كويس يخليه والي في عيوب بسيطة يصلحه ويغسل الملابس بعدين تنكوي ووتطبق ووتنحط في كيس شفاف زي حق المحلات معاها بطاقة معايدة والي يبغي يضيف زيادة يضيف مثلاً يتلف الكيس بشريطة حلوة ومرتبة كأنه هديه ونفس الشي للألعاب نرمي المكسر والخربان ونخلي الكويسين نحطهم في علب او اكياس حلوة نحط عيديات بالموجود عندنا ممكن ننثر عليها شي يلمع ونرفقها مع الملابس ماتدروا انت بعملكم هادا قد ايه تآخدوا أجر والصدقة تطفئ غضب الرب وتدفع البلا بإذن الله وكمان تآخدوا أجر كبير بعمل بسيط وتفرحوا قلوب ناس محرومة
يالله شدو الهمة

Saturday, July 19, 2008

إلى اودة


لقيت صورة لعبودي مو مهزوزة بس علشان خالة اوده لا تزعل مننا
على فكرة لما رحت لمكة في بيت اهلي كانت في قناة اسمها طيور الجنة مرة عجبت الأولاد كل ما طفشوا سنتروا عندها بس اناشيدها تلصق في المخ صرت امشي واغني ااااه يا جزائر اااه يا جزائر ولا يابابا تلفون..إلو مو هون ولا مرة طلعنا ومشينا مشوار بسيارة لينا هي هاااااي هي هااااي
ههههههه
ودي ابتسامة لها من بيتهاا
ربنا ما يحرمناش منك يا اوختي

Tuesday, July 15, 2008

تابع


كان فيه مجمع حلو في جده اسمه رد سي حلو في النهار لأنه كله قزاز من فوق وتدخل الشمس والمطاعم فوق طبعاً فمع الشمس تصير القعده حلوة
ودا مكان في نفس المجمع دعاية لعطر واحد بس

عزوز يحب دي اللعبة مرة وكل مارحنا مكان فيه ملاهي لازم يلعبها

Thursday, July 10, 2008

مبروك يا اختي


حبيت ابارك لأختي تخرجها اخييييييييرا الحمد لله افتكيتي عقبال الوظيفة


Wednesday, July 9, 2008

عدنــــــــــا

عدت والعود أحمد
والحمد لله كانت سفرة جميلة زرنا فيها الأهل والأقارب وتمشينا هنا وهناك سأضع لكم بعضاً من الصور على مراحل..وهذه بعض مناظر من السفر
هذا شروق الشمس في الرياض

وهذا شروق الشمس في مكة