learn English

من فترة ما كتبت مواضيع ..كنت حاسة مالي خلق اكتب. لا جديد في الوقت الحالي سوى اني بتعلم انجليزي يعني بحاول اكون احسن في اللغة وبقرأ روايات انجليزية واحاول اشوف افلام بدون ترجمة وبكتب الكلمات الي ما بعرفها في دفتر ..غير من النت طبعاً.. بس حسيت راسي ما استوعب كمية المعلومات هههههه من زمان عن الدراسة ..حتى وانا نايمة اشوف كلمات انجليزي وما ادري ليه اذا صادفتني كلمة وما عرفت معناها انقهر مو بس انقهر احس بقوة انقهر واحاول اعرفها واكمل قراية ولما ما يمديني اخلص كذا سطر وتطلعلي كلمة تانية انقهر مرة تانية مدري اش الحالة دي تتسمى يمكن لني متحمسة مع القصة وابغى اقرأها وحاسة ان لكلمات الي ما بفهمها بتقطع علي جو القصة فأوقف واعرف معناها وارجع اكمل شكلي راح اقعد سنة عبال ما اخلصها اذا على دا الحال يالله اش ورانا

ستايل

تغيير بسيط للكنب..
الفكرة من Neat Beruks
الي يعمل ديكورات لناس في برنامج اوبرا
كان الشرشف الأسود دا مغطي الكنبة كلها نت حاطة اتنين بس كان مخفي شكل الكنب..وبدي الفكرة سار له منظر حلو اش رأيكم؟؟

الأخلاق التجارية

احس بالطفش دي اليومين والشعور اني ما بدي اسوي شي قاعده اعافر مع عبودي وادرس عناده..والبيت وتنضيفه من ناحية..وادرس شخصية زوجي من ناحية اخرى وطفشانه من نفسي من ناحية ثالثة. ونفسي ننقل من البيت..ونفسي امسك كل شي واكسره

الله يحفظك

الأيام تمر سبحان الله
ماشالله عزوز صار صف أول دحين والفرحة مش سايعاه ههههه
اي هين نشوف شكله بعد كم اسبوع

محاولة بالألوان المائية

دي اول محاولة لي بالألوان المائية..ماقد حاولت ارسم بيها لأني اشوفها صعبة,,بس جربت مع كتاب رسم ويعني طلعت ظريفة صح الظلال مش مزبوطة بس يعني كبداية جيدة..شوفوا الرسمة الصغيرة الي في الصورة الأصل ورسمتي الكبيرة التقليد ههههه

آخر لوحاتي

جاني بالعيد هدية سي دي للرسام المفضل عندي بوب روس لتعليم الرسم بالألوان الزيتية من روزي بينك
ودي رسمتي ..
حاولت دي المرة ما تجي الألوان على يدي ولكن عفست الدنيا للأسف الشديد. نفسي اعرف الرسامين كيف يرسموا اللوحة كلها بدون ما يتلطخوا ولا لطخة واحدة
عاد انا اكره تنظيف الألوان الزيتيةلأنها يبالها حوسة لازم بالتنر..ما تروح بالصابون..قعدت ارسم فيها من الساعه 11 لغاية الساعه وحده أقصر مدة من المرة االي فاتت
يالله فتكم بعافية قولولي رأيكم في اللوحة؟

دام عزك يا وطن

بالرغم من سعادتي باليوم الوطني إلا ان ما قام به المخربون بهذا اليوم افسد معناه وكأن الإحتفال يعني التخريب أوليست هذه بلدك ووطنك الذي تحتفل به ؟!
أليس من حق وطنك أن تحافظ على أرضه وتعتز به فعلاً لا قولاً؟!
أسلوب البعض غير حضاري في التعبير عن الفرحة..رأيت صوراً عديدة للواجهة البحرية بالخبر وقد عكست الأسلوب الهمجي للبعض من تكسير زجاج بعض المطاعم وتحطيم بعض كراسي الحدائق ...الخ حتى أنني اخجل من وضع الصور
بالمقابل رأيت فيديو لبعض الشباب وقد عبروا عن فرحتهم بهذا اليوم بان ركبوا دبابات واضعين العلم السعودي عليه مع لبسهم الخوذ وأهم شئ كان خروجهم بأول النهار وكانت الشوارع حينها خالية من اي زحام لم يضايقوا احد ولم يكن هناك من يضايقهم عبروا عن فرحتهم بأسلوب حضاري راقي يناسب رقي شخصياتهم
اسمع دوماً ماذا قدمت لنا الحكومة وماذا قدم لنا الوطن..
سؤالي أيها المواطن ماذا قدمت انت لوطنك؟؟؟
دام عزك ياوطن

عيد سعيد

كل عام وانتم بخير الله يتقبل منا ومنكم صالح الأعمال

طبعاً العيد فرحة للصغار قبل الكبار وراح ابتدي احطلكم صور العيد

الأولاد روشتهم ولبستهم بجايم العيد ودخلناهم المجلس وسط البالونات والهدايا عزوز وعبودي هنا مع هداياهم

هادي هديتي اجمل هدية جاتني نت بوك صغير وخفيف ودخل قلبي:D

لمزيد من الصور تابعوني في الفيس بوك لأن هنا طفشني اللبلق في تنزيل الصور بالترتيب

شارف رمضان على ان يودعنا

وعلى قدر سرعة مرور هذا الشهر ..أرى انه شارف على الإنتهاء وشعرت بالحزن يعتريني مثل كل سنة عند قرب نهاية رمضان..لأن له طعم خاص..وروحانية خاصة..واشعر فيه بتآلف القلوب أكثر من بقية الشهور..اللهم اعد علينا رمضان أعواماً عديدة وأزمنة مديدة.. اتهيأ لأستعد للعيد وقاربت على الإنتهاء والحمد لله من هدايا وملابس ...الخ انتظروا صوري بالعيد بإذن الله

سحور فطور فطور سحور

عودة حميدة ..أدري انه لي فترة ما بكتب ولكن تعرفوا رمضان وظروفه وتجهيزات العيد والفطور والسحور حوسة
المهم الموضوع الي في البوست الي قبل حق المريخ والقمر شكله خرطي..لأني طلعت وشفت ومو يوم واحد لا كذا يوم يمكن ظهر في بقعه أخرى من العالم الله اعلم حتى طلعت وصورت القمر وكان جنبه فيه نجمة لامعه مدري هو دا قصدهم الكوكب ككككككككك
شوفوا هناك فوق على اليسار نقطة صغيرة << اش رأيكم؟
اختم موضوعي بدعابة من اولادي ..كانو بيلعبوا بهمتارو مرة يحبوه وعندهم همتاروووات صغار مرة ربع لأصباع تقريباً وعندهم واحد ضخم دمية مكشر
جابوا الهمتارو الضخم ووقفوه على بيت همتارو الصغير وهم حطو الهمتارووات الصغار في البيت وخلوا دا الكبير يتكلم بصوت كبير انه بيخاصمهم يرتبوا الغرفة حقتهم(يعني ابوهم)ههههههههههه وهم يصغروا صوتهم انه مغلوب على امرهم صراحة فطست ضحك وصورت المنظر هههههه
وسلامتكم

القمر ولمريخ

يقال أن اليوم راح يظهر المريخ مع القمر بنفس الحجم !! الصراحه ما ني مصدقة مده نشوفه زي زي القمر واضح؟!!علشان كده راح استنى اليوم واطلع السطح الساعه 12 ونص بالليل لأن دا الوقت قالوا حيطلع ودي الظاهرة ماراح تتكرر مرة ثانية الا بعد سنين وسنين ..نسيت كم خخخخخ
فأنتظروني يا اما طلع الخبر صحيح ولا سويت ميث باستد هههههه وراح اوثق الأحداث بالكاميرا طبعاً

آخر تصاميمي

آخر تصاميمي الفوتوشوبية: الخلفية ثوب أبيض رجالي
دمى أولادي المفضلة
تعديلات بالفوتوشوب للإضاءة والكتابة وعمل تأثيرات
عمل فريم بأحد المواقع النتيجة كالآتي
:

اللي بعده
اش رأيكم؟

رمضان كريم

لا أخفيكم سراً ..بأني قد كنت مشغولة عن مدونتي هذه الأسبوعين بين استقبال أهلي وتوديعهم بالأمس ..واستقبال رمضان بإذن الله ربما غدا ً او بعد غد..كما اني اشعر بالنرفزة من الحر الشديد حتى مع جهاز التكييف..الله يرحمنا في رمضان بس..
حبيت اباركلم بالشهر الله يعيننا على صيامه وقيامه

ريحة إيكيا

رحت ايكيا من زمان ما رحته واشتريت دولاب لأغراض اولادي لأنه الدرج الي كنت احط فيه الأغراض اتكسر..ومعد فيه مكان يكفي

بس حلو انه رتب الأغراض ويعلمهم الترتيب كل شي يرجع مكانه بعد ما يخلصوا
واشتريت دي المرايات الي تتحط فوق بعض بالشكل الي تبغيه

وحطيت على جدار غرفتي من دي الإستكرات بس بصراحه فيها عيب انها ما تلصق مزبوط مع انه جداري عادي بس تاني يوم اتفكت كلها واضطريت احط صمغ..وشكلي بزود عليها حسيتها قليلة

واشتريت رف بس لسه ما قررت فين احطه
وبس

واختفى كل شئ

بدات أقرأ هادي القصة ..دوبي الفصل الأول ما حسيت بحماس مع بداية القصة لكن يمكن مع تطور الأحداث فيها اغيير رأي وماراح اقول شي عنها لغاية ما انتهي منها
كل ما ادور روايات بالعربي في النت تكون روايات غرامية مافي رواية غريبة اسلوبها مختلف العرب رواياتهم تشبه بعض أغلبها تدور عن الحب والخداع ولا كيف انهم متحررين بره البلاد..يعني هي حلوة القصة لما يكون فيها حب بس مو انها تكون محور القصة بس او يكون حب بس بأسلوب مختلف وبطريقة غير معتادة.
تعجبني قصص اكس فايلز بس ياريت في منها بالعربي
..ومع الحماس حق الروايات..بدأت اكتب رواية ووصلت لجزء دحين موقفة فيه ..استنى الإلهام ينزل علي ...خخخخخ
وإذا خلصتها ولقيت عليها اقبال راح اطبعها انشالله وابيعها ..تحسوا مخ تجاري هههه يعني بأحلم لساعي بس عادي ممكن يصير من جد الواحد يتفاءل في الحياة ولا

أقروا البوست الي تحت أول

آخر شي أكلنا من دي الكيكات اللزيزة في الطعم والرهيبة في الشكل شكلهم زي الكيكات الكبار بس حجمها صغنطوط

ابطال الحفلة

على اليمين فارس المتخرج من تمهيدي على اليسار عبد الرحمن الي عامل العملية بإدنه

حفلة نجاح

أمس حضرت حفلة بمناسبة قومة عبد الرحمن بالسلامة من عملية اللحمية وموية بالإدن..ونجاح فارس
كان الجو العام للحفلة مبهج للأطفال وانبسطو مرة يعطيهم العافية القائمين عليها كانت الفكرة عبارة عن أركان
ركن للفشار للي يبغا فشار وركن للذرة
وركن لتزيين الكيكوالرسم على الرمل

وركن للرسم على الوش هنا اختي ميعاد طلبت تحط رسمة تدل على اعجابها بالإتحاد
وشغلولهم فقاقيع اتهبلوا عليها واناشيد طيور الجنة وآخر شي وزعوا عليهم زي الباكج فيه حلويات وألعاب وعصي ملونة ..ورجعوا الأولاد مبسوطين
فارس الي على اليمين هو الي اتخرج من التمهيدي الي على اليسار عبد الرحمن الي عمل العملية حقت ادنه

حكمل الموضوع في بوست جديد لأنه مش راضي يحط الصور عدل

هيلا هوب

بعد ما رجعت من السفر وخربطنا شعبان على رمضان في الأكل زدت شوية بالوزن ولي دحين 9 أيأم بمشي نص ساعه باليوم امس زودتها ساعه الا ربع اليوم زودتها ساعه ودبي خلصت حسيت نفسي آخر ربع ساعه جاني الكساح من كتر ما تعبت واسحب في رجلي تسحيب بس الا واكمل الساعه خخخخخ وبكرة وبعده انشالله راح استمر على الساعه دي حتى القى نفسي امشي عادي ما تعبت
منه تنحف البطن ومنه لياقة ..بس ان شالله استمر لحسن بناطلي بدات تضيق تصرلي أزمة نفسية ازا بنطلوني ضاق علي

لي فترة ما خيطت عشان في وزغة صغيرة في الغرفة ومحد راضي يموتها :(مابدي ادخل الغرفة والاقيها ..

تابع تطبيقاتي الفوتوشوبية

هادي بعض تصميماتي في الفوتوشوب انا طبقتها من موقع يعني مو حرافة من راسي
دا تطبيق درس كتابة اسم بطريقة ثلجيه

تطبيق للدرس انعكاس الصورة في الماء

ودي كده عالسريع من راسي

ودي تطبيق لدرس عمل خلفية ثلجية

رحلتنا لمكة وجده والرياض

هادي بعض الصور التقطتها اثناء الرحلة..

من كورنيش جده
الغرووب
الكورنيش برضه
جبل ثور من القمة
برج الفيصليه
لما سوينا عمرة دي ميعادو
ودي صور أولادي وبناتي في العيلة جنى مع عزوز وعبود
بلال وهالة وعزوز وعبود

بلال وهلولة

فيه صور كمان بس يكفي حطيت كتير ههههه

حفلة تخرج حبيب ألبي

الحمد لله اتصلحت أموري الإنترنتية وحبدأ احط المواضيع الي فاتت
بداية حفلة تخرج عزوز ..كانت حلوة وكنت ماسكة نفسي بالقوة والصراحه بكيت من اول طفل طلع على المسرح حتى قبل لا يطلع عزوز ههههه مرة دموعي كل شوية تنزل وامسحها عشان البريستيج خخخخ
الله يحفظه وعقبال ما اشوفه متخرج من الجامعه
دي صور حفلة تخرجه
ودي الكيكة وحده من الكيكات الي جابتها أم لكل الخريجين يعني جابت ماشالله 4 كيكات لكل الأربعه الفصول
ودول صاحباته خخخخخ في الصف بيآكلو من الكيكة
وأصحابه
صاحبه العزيز مساعد الي في النص
الله يوفقهم كلهم يارب صحيح الموضوع متأخر بس من طول الغيبات جاب الغنايم ;)ولا

اخيييرا والحمد لله

الحمد لله أنحلت مشكلة الشاحن والنت شبكت بكونكت موبايلي كويس لحد الآن انشالله اليوم بنزل الصور على جهازي وافرجكم عليها

so and so

i am back wal7mdolelea
but there is no dsl, i connected with delup.. it's slow but it's OK.
another problem is : the charger of my lab top is not working because of that i can't open it ,i am log in with my husband laptop and there is no Arabic key bord so,my post probably few until all this fix it .
any way i posted 3zoz graduation on face book until fix every thing.

مكة الحبيبة

كنت حابة احط صور تخرج عزوز على طول لكني رحت مكة على طول
إنشالله لما ارجع بحطلكم الصور واوافيكم بجديدي ..
الجو هنا في مكة أرحم من الشرقية صح حر بس الخبر احر بكتيير
كمان النت عندي مش مزبوط وأغلب الوقت مفصول علشان كده ما قدرت احط بوستات
وصور
وحشتوني
اشوفكم على خير

آخر يوم

اليوم آخر يوم لعزوز بالتمهيدي وبكرة انشالله حفلة التخرج
سويت كرتين لمعلماته وهو عبر لهم الكلام يضحك بس بريييييييييييييئ يختي عليهم الأطفال
ساعدته في الإملاء وعملتله طبق بيتزا دواير علشان يوزعها على اصحابه لأنهم عاملين حفلة صغيرة بينهم وبين مدرساتهم اليوم
هادا كرت أبلة منى
ودا كلام عزوز بداخله
ود ا كرت أبلة جواهر
ودا كلام عزوز بداخله

إلي مافهم الخط ترجمه:
إلى معلمتي التي تحب الألوان منى:
كل سنة وانت طيبة ..أنت تلبسين ملابس حلوة وأنا أحبك يا أبلة منى في المدرسة وفي المسرح
(ههههههههههه)لزيز دا الولد

إلى معلمتي جواهر الغالية:
أنت تحبين أن تأكلي خبز بالزعتر وبسكوت وأنت أحسن أبلة في العالم

ههههههههههههه اش دخل الخبز بالزعتر ههههههه
براءة الطفولة إذا لاحظتوا الخط في الكرت الأول كان أرتب لأنه كان مروق
والخط التاني كان مرجوج ومبسوط هههههه

آخر ما سويت

بدون مقدمات شوفوا الصور مافي اتكلم هههههه
الشنطة انباعت وتلبيسة علبة المناديل تجربة بس القطعة الي تحت مو مرة زابطة حجرب ان شالله تاني

تابع

ههههههه ركبت صورة الرجال بس مدري ليه كده سار صغير

بداياتي الفوتوشوبية

من زمان وانا نفسي اتعلم على الفوتوشوب حسيت كل الناس فاهمين فيه الا انا فقررت اتعلمه وقعدت اقرأ في النت درووس واطبق شي يزبط وشي ما يزبط وشي نص ونص على العموم حوريكم تصاميمي البسيطة
أول شي عملت دمج في دي الصورة
ثاني صورة طبقتها من درس عمل موج وهي مش صورة وانا عدلتها لا بدأت اعملها من البداية للنهاية
وهنا نفس الصورة بعد ما خلصتها دبلتها مرة تانية علشان ابين الموج اكتر
حاولت اركب صورة واحد بيتركمج على الأمواج بس ما عرفت:( اذا عرفت بحط الصورة

علاقتنا مع أولادنا وبناتنا

كتير من المرات يحز في نفسي لما نروح نمشي الأولاد على الكورنيش وأشوف أم وأب قاعدين في السيارة وبنتهم الي عمرها سنتين سايبينها تلعب في المراجيح لوحدها وتروح وتجي على الرصيف وقريب من الشارع وهم جوة السيارة يراقبوها ؟ على بالهم راح يلحقووها لو جريت على الشارع ...ولما تخلص البنت من اللعب ينادوها: يالله خلاص تعالي بنروح يعني ما كلفوا نفسهم انهم يمرجحوها يلعبوا معاها او حتى ينزلوا في الكراسي الي جنب المراجيح..حسيت هم في عالم والبنت في عالم تاني وكانت تجري ورا بسه وقلبي بيطيح من مكانه لأنها بتجري مرة عند الشارع وخفت البسة تروح على الشارع والبنت تلحقها وما يمديهم يمسكوها خاصة ان السيارت طايرة بس الحمد لله الله ستر وماراحت البسة هناك
وأحيان كتير في الملاهي تلاقي الأطفال مع الشغالات
تعرفوا اللعبة ديك الي زي المتاهة يدخلوا فيها الأطفال يطلعوا وينزلوا شفت هناك 3 بنات ومعاهم شغالتين لعبوا لعبوا لما طفشوا ولابسين جزمهم وقاعدين عند الباب يستنوا اهاليهم يجوا يآخدوهم إلي نامت والي تبكي والي طفشانة عمرها والشغاله معاهم..حرام حزنوني يعني الأم بتروح السوق وحابسة بناتها في دي اللعبة حتى ياريتها كانت كبيرة علشان يحوسوا فيها شوية..وحتى ماراحوا لعبة تانية
نحن لعبنا الأولاد وخلصنا وهم لساتهم هناك
ما أقول اني أم مثاليه حتى انا مقصرة مع اولادي بس بحاول اشاركهم في الحاجات الي تفرحهم ولما ما يكون لي خلق لهم اعوضهم في وقت تاني وأكتر وقت أحس انه ممكن يتكلموا فيه بلي في قلبهم وقت النوم لما اجي اغطيهم وكل واحد يحكيني شي الله يحفظهم يارب..

مممممم

لي فترة ما كتبت مدري مالي خلق اكتب واليوم جاتني نفس اكتب بس مدري اش اكتب ههههههه
الحر شديد طبعاً ..اليوم قررت انضف المخزن بعد ما خلصت آخر طلبية شنطة عندي ان شالله انزلها لكم نفس الشنطة الي على شكل مربعات بس قماش غير
نضفت ربع المخزن وراح اكمل بكرة وتوقفت لأني فطست من الحر..
دي الغرفة تغبر مرة بسرعه وتنرفزني الغبرة قد ما انضف فيها احس الغبرة تدخل تراب مو غبار راح انضفها كلها وامسك الشبابيك والصقها كلها على امل ما تدخل غبرة مرة تانية
الزرع مسكين كمان يعاني مع الحر ما يمر يومين الا هو نشف مع انه المفروض ينسقى مرتين بس بالسبوع بس صرله جفاف مع الحر صرت اسقيه اكثر
وبس