واجــــــــــــب ---اتصلح الكلام----

أفضل مرحلة تعليمية درستها ؟

هادا واجب المدونات والمدونين كل واحد يمرره للي يحب بعده وجا الدور علي

الأسئلة:

الصراحه كانت المرحلة الثانوية رغم ان السنة الأخيرة كانت فيها شوية مشاكل مع الصاحبات لكنها عموماً احلى مرحلة دراسية فيها سويت كل شي بكل براءة وكنت اعتبر الأشياء الي كنت اسويها مصايب لو احكيكم عنها تضحكوا علي تقولوا هادي بالله مصايب..الجامعه كانت حلوة كمان بس كنت فيها ناضجه اكثر الثانوية كان فيها استهبال كتير خاصة ثانية ثانوي

أسوأ مرحلة تعليمية مرت عليك ؟

الإبتدائي _رغم اني كنت في مدرسة اهلية وكانت مدرسة حلوة الا اني كنت بنت خجولة وهادئة ما عندي صاحبات الا وحده بس وكان ما عندي ثقة في نفسي وكانوا البنات الي شايفين نفسهم يتريقوا على اغراضي وعلى شعري عشان كنت قاصته بوي (على فكرة حتى انا ما كانت عاجبتني القصة )وقعدت سنة كاملة اروح المدرسة لابسة طرحه لغاية ما طول شعري علشان لحد يتريق علي أحزن
حاقده على البنات دول لليوم خخخخخ
عادواحده قابلتها في الكليه لما كبرنا وماشفتها قيد من هديك المرحلة وكانت حامل بس حزنت عليها وسامحتها لأنها ضربتني على عيني بلوحة فلين وجا ركنها في عيني بس ما كانت تقصد كانت بتلعب بيها وتفرفرها يمين يسار على جيتي وانجرحت قرنيتي وحالتي حاله كانت مأساة الإبتدائي

- أفضل المدرسين اللي مروا عليك ؟

الإبتدائي
سنة ثالث ابتدائي:أبلة سلوى البطة كانت مرررة تحبني وتدلعني وتوقف الفصل كله اذا ما سمع الكلام وتجلسني (طبعاً غلط)حسيت البنات حقدوا علي
وابلة سناء حقت الإنجليزي
في المتوسط:أبلة هند حقت العربي
في الثانوية:أبلة فوزية فارع مدرسة رائعة ورهيبة كانت معانا واخلاقها عاليه وكنت اعتبرها زي الأم في المدرسة والى الآن متواصلة معاها
في الجامعه:ولا ااااا مدرسة

أحب المواد اللي درستها ؟

طبعاً لغة عربية
انجليزي

أكره المواد اللي مرت عليك ؟

التاريخ_المواد العلمية خاصة الكيمياء والفيزياء

آخر شهادة علمية حصلت عليها , وتخصصك ؟

بكالوريس لغه عربية

أطرف موقف مر عليك في دراستك ؟

يوه يا مكترها حقلكم كم موقف كنت في المتوسط وكان الإختبار النهائي لمادة التعبير وكان السؤال اختاري احد الموضوعين واحد كان عن وصف الربيع والتاني اكتبي قصة من تأليفك ..عاد انا اخترت القصة وسويت فلم هندي وقصة حزينة لدرجة اني بكيت مع القصة هههههه(دخلت جو) والمراقبة تسألني فيك شي وانا اقلها لا مابقي في الفصل غير انا وكم بنت يحسبوني مني عارفة اعبر بعدين راحوا نادوا ماما وكانت وكيلة في نفس المدرسة وشافت الدموع في عيني سارت تأشرلي وتقلي اشبك وانا اقلها مافي شي لمن خلصت الإمتحان رحتلها وقالتلي اشبك تبكي قلقتيني قلتلها لا مافي شي بس اندمجت مع القصة الحزينة الي انا كاتبها كان وددها ترميني بالي في يدها خخخ ماالومها بعدين سيرتي سارت على كل لسان من المدرسات ماما حكتهم وبس يضحكوا علي وافشيلتاه
و اتزكر مرة في حصة الجغرافيا بالثانوي كانت المدرسة بتشرح وانا كنت الله يكرمكم مفسخه جزمتي وفجأة تندار علي وتقلي قومي حددي المدينة على الخريطة وانا من الفجعه لبست فردة والتانية لا وجيت طالعه وانتبهت وقعدت البس في الجزمة التانية وكانت حفلة عشان تتلبس وهي تطالع في والبنات يطالعوا في قمت دخلتها اي كلام وطلعت على السبورة اعرج ....مرة كان فشللللة لأني لبست الجزمة وما دخلت صح

ومرة بعد تخرجنا من الثانوية جينا انا وكم وحده من صحباتي للمدرسة نسلم على مدرساتنا وكانت المديرة حقتنا شريرة وقالوا البنات خلينا نسلم عليها قلتلهم اش تبوا فيها كشرة وبس تضارب قالوا لا معليش اشا تبا فينا نحن اتخرجنا محتقول شي ومدريش قلت طيب اجي معاكم بس ماراح اتكلم معاها ورحنا وسلمنا وانبسطت المديرة الا وهي في نص المدح ينقلب ذم قعدت تهزأنا على لبسنا عشان كم قصير ومايلائم المكان واخدنا على راسنا ولما طلعت قعدت اضحك على البنات وقلتلهم قايلتلكم ما سمعتوني

- أصعب موقف مر عليك في دراستك ؟

كان عندي اختبار نحو وكان الكتاب شرح ابن عقيل ندرس منه في كل سنوات الكلية فلمن نخلص الترم احط علامة مكان ما خلص علشان لمن نبدأ الترم التاني اعرف من فين بدأنا ولما جا الإمتحان النهائي جيت ابغا ابدأ اذاكر ما لقيت العلامة وبدأت من مكان ما اتزكرت وقعدت ازاكر لغاية الساعه 9 الليل وبعدين كلمتني صاحبتني وكنا بنتكلم وجات سيرة المرزاكرة واكتشفت منها اني بزاكر في جزء الترم الأول وقعدت ابكي على الوقت الي راح على الفاضي وعلى الوقت الي باقيلي ما ادري اذا يمديني ازاكر الباقي ولا لا بس حمد لله عدت على خير ونجحت
في موقف تاني كمان لما جيت اختبر في الثانوية جغرافيا وتعرفوا قبل ما يبدأ الإختبار البنات يتكلموا ويحاولوا يتزكروا بعض المعلومات الي زاكروها وانا اسمع منهم واحس نفسي ما زاكرت ولا شي كأنهم يقولوا معلومات جديدهفجأة والأوراق تتوزع نزل علي البكا وصرت ابكيييييييييي وابكيييييييي والأبلة تسكت في وصاحبتي تسكت في وانا ابداً البكا نزل علي خخخخخ بس لمن هديت والحمد لله حليت خخخخخ

أمرر الواجب لـ
روزي بينك دريمز
رد روز

و إلى صاحبة مدونة لاشئ يمنعنا ابعد من انوفنا