إحبااااط

تتوالى احياناً الأمور المحبطة تباعاً..ونضطر إلى التخلي عن بعض الأمور التي اعتدنا عليها لأجل أمور اهم...لكن ما يلهمنا الصبر والسلوان..هو تطلعنا إلى ما هو أفضل
وبإذن الله القادم احلى

آخر تصميماتي

عملت دا التصميم بعد وقت طويل (لأني مبتدئة) والحمد لله قدرت اطبق درس عمل توقيع للمنتديات ..بس لسه ما حطيته خليني افرح فيه شوية هههههه

بس اش رأيكم؟

A Cup of Cake

أمس أكلت كب كيك لذيييذ من محل الكب كيك الي جات دعايته على الإيميلات .....المحل في شارع البيبسي
هادي الكب كيك منه لذيييذه.. ودي شكل العلبة
عجبني الديكور وشكل العلب بسيط وحلو دا المحل اخدت الصور من النت
في الرابط الي تحت حتلاقوا اشكال رهيبة للكب كيك الي بعملوه
http://forum.te3p.com/219965.html

آخر المستجدات

من زمان ما كتبت..وحشني البلق.....حرجع اكتب فيه مرة اخرى انشالله..ومحطول الغيبة كثير المرة الجية(إذا ما صار شي)خخخخخ

آخر اعمالي من الكروشيه جاكيت عبودي ..
طبعاً راح أعمل واحد تاني لعزوز .بدأت فيه بس لسه ما خلص

كمان جاتني هدية حلوة ...

مرة كيوت صح؟لاتقولوا عني صغيرة ههههه
كمان صاحبتي آخر مرة عملت كيك مرة جميل ماشالله تسلم يدها وطعمه يمي من جوه، فيه الوان زي الرينبو

هو شكله مو مرة واضح في دي الصورة لأن التزيين الي على الوجه احلى من كده

ممممم وآخر شي عملته اني نضفت غرفة الأولاد تنضيفاً شاملاً من جرد الألعاب المكسرة والغير مستخدمه وتنضيف صندوق الألعاب وكل شي في الغرفة (الشباك وتحت السرر والمكيف)ورجعت الألعاب لمقسمات الأدراج لأنها كل بعد فترة يرجعوا يكركبوهم على بعض وارجع اشرحلهم انه كل شي مكانه
المساعد الصغير في الترتيب عبودي:)
هادي صور الغرفة بعد الترتيب والتنضيف والي بذمه
وإلى الملتقى بإذن الله في موضوع جديد

واخيييييييييييييييرا ما بغيت اخلصه

انتهيت اخيييرا من عمل الفستان الي ذكرته سابقاً..اخد مني وقت طويل حتى خلص وصوف كتيييير لأنه موديله على كلوش مع انه فستان صغنوط ..يمكن تتساءلوا ليش بعمل فستان ولمين؟؟بصراحه ما فكرت لمين ..كنت ابحث في النت عن دروس كورشيه وطلعت صورة الفستان بوجهي ومرة عجبني فقلت اجرب ان خرب فرطته وان لا مشيت بس لأني كنت مصرة اعمله فرطته مليون مرة ههههه وعدته تاني واتشنج كتفي كذا مرة بس الإصرار هههه
اللون في الصورة احلى من الحقيقي .. لون الوردي في الحقيقة فاقع شوية..بس انبسطت اني قدرت اعمله بالخطوات مع وحده كانت عاملة ورشة عمل في احدى منتديات الكورشيه..طبعاً في شوية اغلاط بس ممكن تتخبى وماتبان انشالله نتداركها المرة القادمة
الخطة الخمسية الثانية ابغى اعمل شيلان لأولادي بس اشتري الصوف اول ويصير خير

كروشييييييييييييييه

اتحمست الفترة الأخيرة بعمل الكروشيه ..حالياً بعمل فستان لطفلة بعمر سنة ..هو مو لأحد معين لكني دخلت على درووس الكروشيه ولقيت دا الفستان واحده شارحة طريقة العمل وعجبني فقلت اجرب بس طفشني مهو راضي يخلص وياكل الخيط اكل ..وابا اخلص عشان اشوف النتيجه طبعا فيه اخطاء شوية لكن برضه بدي اكمله اول ما يخلص راح احط صورته
مرة تعبني وكتفي سار يعورني بسببه بس احيان الواحد من الحماس يبا يشوف النتيجة بسرعه هههه
انشالله اخلصه دا الأسبوع واحط صورته

الجزء الثاني

دي الصورة المفروض تكون تحت بس طفشتني مهي راضية تنزل هي آخر صورة كانت هلولة مبسوطة مع بطوط وفجأة خافت منه قام جا وراها يضحك عليها يبا يفجعها هههه





البدر مكتمل كااان رهيب دا في النهار والصورة الي تحت بالليل طبعاً ههههه اجل متى
دي بعض المناظر الحلوة للغروب
شوية صور متفرقة

عيد الحج

مضى وقت طويل على آخر تدوينة لي..لا ادري ربما فقدت الإهتمام بالكتابة فترة..او لإنشغالي بالفيس بوك وكثير من الأمور التي افعلها معاً..لكن ها انا ذا عدت ثانية بالغنائم:P
اولاً:كل عيد اضحى وانتم بخير
قضينا اوقاتاً جميلة مع جو جميل ورائع واحتد البرد فجاة..فرح الأطفال باللعب بالرمال والجري في الأرض الواسعه واللعب سوياً وسعد الكبار بالتجول في خضرة المكان وتأمل الغروب..وركوب السفن الصغيرة والشواء..
هذه بعض الصور اللطيفة والظريفة تحكي وتعبر عن نفسها:

الجزء التاني انشالله غداً حيكزن مناظر خلابة

My new stuff yes

قبل فترة كان نفسي اشتري ستاند شفته في احدى المواقع حق الكاميرا..وكان معاه بيت حتشوفوه في الصورة تحت احط في الغرض مع كشافات علشان اصور زي موقع تصوير بس على صغير وحاولت اطلبه بالنت بس كان مخلص قبل كم اسبوع اتوفر عندهم وجات الطلبية حقتي امس ومررة عجبني مفيد في التصوير خاصة للي يبا يبيع حاجات واذا تبغي تصوري صورة بخلفية ساده
هادي صورة العدة
حطيت دي الطيارة جوة بس اشوف كيف كنموذج وهادي النتيجة
وهنا طفيت النور من وحدة ناحية وجبت النور التاني من الجنب يعني مش مباشرة داخل النور لا انعكاسه من ورا البلاستيك الأبيض هو الي في الصورة مبين
بس الكرمشة حقت البلاستيك قاهرتني مدري كيف ينفرد هو يجي مطبوق زي عازل الشمس حق السيارة كمان لو لاحظتو في الصور في مربع ابيض طلع شكشك معاه قطعه صغيره ملصق فيها الطرف التاني من الشكشك اذا بدي اصور
شي اعلقها على دا الشكشك بس كنت مضايقة منه لأنه مبين في الصور بعدين اكتشف اني حاطته اصلاً مقلوب هههههه دلاخة
وقريباً راح اصور انشالله صور حلوة بدي الطريقة الجهنمية باقيلي الكاميرا الإحترافيه عقبال ما اقدر اشتريها يوم من الأيام

learn English

من فترة ما كتبت مواضيع ..كنت حاسة مالي خلق اكتب. لا جديد في الوقت الحالي سوى اني بتعلم انجليزي يعني بحاول اكون احسن في اللغة وبقرأ روايات انجليزية واحاول اشوف افلام بدون ترجمة وبكتب الكلمات الي ما بعرفها في دفتر ..غير من النت طبعاً.. بس حسيت راسي ما استوعب كمية المعلومات هههههه من زمان عن الدراسة ..حتى وانا نايمة اشوف كلمات انجليزي وما ادري ليه اذا صادفتني كلمة وما عرفت معناها انقهر مو بس انقهر احس بقوة انقهر واحاول اعرفها واكمل قراية ولما ما يمديني اخلص كذا سطر وتطلعلي كلمة تانية انقهر مرة تانية مدري اش الحالة دي تتسمى يمكن لني متحمسة مع القصة وابغى اقرأها وحاسة ان لكلمات الي ما بفهمها بتقطع علي جو القصة فأوقف واعرف معناها وارجع اكمل شكلي راح اقعد سنة عبال ما اخلصها اذا على دا الحال يالله اش ورانا

ستايل

تغيير بسيط للكنب..
الفكرة من Neat Beruks
الي يعمل ديكورات لناس في برنامج اوبرا
كان الشرشف الأسود دا مغطي الكنبة كلها نت حاطة اتنين بس كان مخفي شكل الكنب..وبدي الفكرة سار له منظر حلو اش رأيكم؟؟

الأخلاق التجارية

احس بالطفش دي اليومين والشعور اني ما بدي اسوي شي قاعده اعافر مع عبودي وادرس عناده..والبيت وتنضيفه من ناحية..وادرس شخصية زوجي من ناحية اخرى وطفشانه من نفسي من ناحية ثالثة. ونفسي ننقل من البيت..ونفسي امسك كل شي واكسره

الله يحفظك

الأيام تمر سبحان الله
ماشالله عزوز صار صف أول دحين والفرحة مش سايعاه ههههه
اي هين نشوف شكله بعد كم اسبوع

محاولة بالألوان المائية

دي اول محاولة لي بالألوان المائية..ماقد حاولت ارسم بيها لأني اشوفها صعبة,,بس جربت مع كتاب رسم ويعني طلعت ظريفة صح الظلال مش مزبوطة بس يعني كبداية جيدة..شوفوا الرسمة الصغيرة الي في الصورة الأصل ورسمتي الكبيرة التقليد ههههه

آخر لوحاتي

جاني بالعيد هدية سي دي للرسام المفضل عندي بوب روس لتعليم الرسم بالألوان الزيتية من روزي بينك
ودي رسمتي ..
حاولت دي المرة ما تجي الألوان على يدي ولكن عفست الدنيا للأسف الشديد. نفسي اعرف الرسامين كيف يرسموا اللوحة كلها بدون ما يتلطخوا ولا لطخة واحدة
عاد انا اكره تنظيف الألوان الزيتيةلأنها يبالها حوسة لازم بالتنر..ما تروح بالصابون..قعدت ارسم فيها من الساعه 11 لغاية الساعه وحده أقصر مدة من المرة االي فاتت
يالله فتكم بعافية قولولي رأيكم في اللوحة؟

دام عزك يا وطن

بالرغم من سعادتي باليوم الوطني إلا ان ما قام به المخربون بهذا اليوم افسد معناه وكأن الإحتفال يعني التخريب أوليست هذه بلدك ووطنك الذي تحتفل به ؟!
أليس من حق وطنك أن تحافظ على أرضه وتعتز به فعلاً لا قولاً؟!
أسلوب البعض غير حضاري في التعبير عن الفرحة..رأيت صوراً عديدة للواجهة البحرية بالخبر وقد عكست الأسلوب الهمجي للبعض من تكسير زجاج بعض المطاعم وتحطيم بعض كراسي الحدائق ...الخ حتى أنني اخجل من وضع الصور
بالمقابل رأيت فيديو لبعض الشباب وقد عبروا عن فرحتهم بهذا اليوم بان ركبوا دبابات واضعين العلم السعودي عليه مع لبسهم الخوذ وأهم شئ كان خروجهم بأول النهار وكانت الشوارع حينها خالية من اي زحام لم يضايقوا احد ولم يكن هناك من يضايقهم عبروا عن فرحتهم بأسلوب حضاري راقي يناسب رقي شخصياتهم
اسمع دوماً ماذا قدمت لنا الحكومة وماذا قدم لنا الوطن..
سؤالي أيها المواطن ماذا قدمت انت لوطنك؟؟؟
دام عزك ياوطن

عيد سعيد

كل عام وانتم بخير الله يتقبل منا ومنكم صالح الأعمال

طبعاً العيد فرحة للصغار قبل الكبار وراح ابتدي احطلكم صور العيد

الأولاد روشتهم ولبستهم بجايم العيد ودخلناهم المجلس وسط البالونات والهدايا عزوز وعبودي هنا مع هداياهم

هادي هديتي اجمل هدية جاتني نت بوك صغير وخفيف ودخل قلبي:D

لمزيد من الصور تابعوني في الفيس بوك لأن هنا طفشني اللبلق في تنزيل الصور بالترتيب

شارف رمضان على ان يودعنا

وعلى قدر سرعة مرور هذا الشهر ..أرى انه شارف على الإنتهاء وشعرت بالحزن يعتريني مثل كل سنة عند قرب نهاية رمضان..لأن له طعم خاص..وروحانية خاصة..واشعر فيه بتآلف القلوب أكثر من بقية الشهور..اللهم اعد علينا رمضان أعواماً عديدة وأزمنة مديدة.. اتهيأ لأستعد للعيد وقاربت على الإنتهاء والحمد لله من هدايا وملابس ...الخ انتظروا صوري بالعيد بإذن الله

سحور فطور فطور سحور

عودة حميدة ..أدري انه لي فترة ما بكتب ولكن تعرفوا رمضان وظروفه وتجهيزات العيد والفطور والسحور حوسة
المهم الموضوع الي في البوست الي قبل حق المريخ والقمر شكله خرطي..لأني طلعت وشفت ومو يوم واحد لا كذا يوم يمكن ظهر في بقعه أخرى من العالم الله اعلم حتى طلعت وصورت القمر وكان جنبه فيه نجمة لامعه مدري هو دا قصدهم الكوكب ككككككككك
شوفوا هناك فوق على اليسار نقطة صغيرة << اش رأيكم؟
اختم موضوعي بدعابة من اولادي ..كانو بيلعبوا بهمتارو مرة يحبوه وعندهم همتاروووات صغار مرة ربع لأصباع تقريباً وعندهم واحد ضخم دمية مكشر
جابوا الهمتارو الضخم ووقفوه على بيت همتارو الصغير وهم حطو الهمتارووات الصغار في البيت وخلوا دا الكبير يتكلم بصوت كبير انه بيخاصمهم يرتبوا الغرفة حقتهم(يعني ابوهم)ههههههههههه وهم يصغروا صوتهم انه مغلوب على امرهم صراحة فطست ضحك وصورت المنظر هههههه
وسلامتكم

القمر ولمريخ

يقال أن اليوم راح يظهر المريخ مع القمر بنفس الحجم !! الصراحه ما ني مصدقة مده نشوفه زي زي القمر واضح؟!!علشان كده راح استنى اليوم واطلع السطح الساعه 12 ونص بالليل لأن دا الوقت قالوا حيطلع ودي الظاهرة ماراح تتكرر مرة ثانية الا بعد سنين وسنين ..نسيت كم خخخخخ
فأنتظروني يا اما طلع الخبر صحيح ولا سويت ميث باستد هههههه وراح اوثق الأحداث بالكاميرا طبعاً

آخر تصاميمي

آخر تصاميمي الفوتوشوبية: الخلفية ثوب أبيض رجالي
دمى أولادي المفضلة
تعديلات بالفوتوشوب للإضاءة والكتابة وعمل تأثيرات
عمل فريم بأحد المواقع النتيجة كالآتي
:

اللي بعده
اش رأيكم؟