افتقدك يا امي

افتقدك يا امي
افتقد اللمة معاك
وافتقد حسك
احياناً محد يفهمني غيرك ..ويدعيلي ويحس في غيرك
اشتقتلك لأني احبك
اشتقتلك لأنك رفيقتي

كل القناديل التي اسرجت من بعدك اصبحت خافية
ياحسرة الدار التي اصبحت من كل آثار الرضا خاوية
كم حرقة في القلب اطفأتها بدعوة صـادقة صافية
ارسلتها في الليل ممزوجة بأدمع مقــــلتي الباكية
وجههتها لله في ليلة بأن يجمعنا في الجنان الباقية

الأبيات منقولة

رسمات عزوز

الفوتو بوكت برضه قافل حملت على موقع تاني

طفشكتم بالمعيز حقوني ولا لسه هههههه كله عشان خاطر اولادنا الحلوين

امس عزوز قعد يرسمنا انا وابوه في السبورة حقته شوفوا اشكالنا بس لاتضحكوا خخخخخخ

وقلتله ارسم عبودي

بعدين قلتله ارسم عمة طيب قام رسمها ومعاها اسكريم

هادي الدواوير الي على جنب هي الإسكريم خخخخخ
طلبت يرسم اشخاص تانين طفش وقام شكله قال مصختها

الفوتو بوكيت

اليوم قفل الفوتوبوكت عندي وانحجب
فراح استنى كم يوم امكن يفتحوه علشان صوري هناك

معزة تانية لعبودي

اول شي طلعت معزة مو خروف هههه يالله كلهم قرايب
هادي معزة عبودي زبطت احلى من حقت عزوز
حقد امس عبودي ونتف ادن معزة عزوز مع اني قلتله بكرة اسويلك واحده بس مافي صبر يبغالي اعطيهم الشي مع بعض
حزنت على حقت عزوز رجعت عدلتها بس برضه المعزة البنفسجية احلى وازبط
اش رأيكم ؟

الخروووووووف

ولدي عزوز مايحب يعبر عن الي في نفسه

ولي فترة بحفظهم سورة الإخلاص ويقرا ورايا ولما اجي اقله يالله انت قول يقلي كلل كلك كل
اي خربوطة وخلاص المهم قررت اعمله خروف هدية اذا حفظها وقلي هيا بصوت واضح لأنه حتى لما يقرا صوته واطي
يعني نفع الموضوع شوية وسمعلي هيا فيه اغلاط شوية بس سمعها من غير ما يسوي هبالة وبصوت عدل
المهم خليني اوريكم الخروف التحفة بس لاتتريقوا عليه ادري شكله يضحك بس دا الي طلع بإيدي

ودا البترون

ميلاد اختي

على سيرة عيد ميلادي الي كان الأربعاء كمان كان في نفس الأسبوع ميلاد اختي بس هي بالهجري وانا ميلادي وسوينالها مفاجأة الي هي دي

وكل سنة وانت طيبة يا اختي

البيت لما يخلا

تعرفوا الشعور الي يجي للواحد لما يكون البيت مليان ويروحوا الي عندك كده اليوم احس
تحس فجأة بالفراغ مكانهم ويجيك شعور مو حلو بس
الحمد لله دا الأسبوع قضيناه مع اخواتي واخوية البيت كان زحمة بس شعور حلو انه مليان بس مو حلو لما راحوا انشالله يكونوا انبسطوا معانا
اليوم رجعتهم ودوبهم وصلوا الحمد لله بعد المشورة الي اتمشورناها في المطار عشان لا تفوتهم الطيارة حتى ماسلمنا على بعض نجري ونجري من هنا لا من هنا واحد نسي تزكرته في التفتيش ورجع يا خدها غيرالزحمة الي في التفتيش وفي الشنط كلموا الطيارة انهم ما يمشوا المهم هم يجروا ونحن نجري من ورا القزاز ههههههه لما راحوا بعيد عن عيننا المهم آخر شي وصلوا البوابة آخر شي مالقوا احد االبوابة مقفولة وما في احد كلمونا قلت :لا اااا لاتكون راحت عليهم الرحلة زي في الجية انتظرنا شوية وصلينا المغرب بعدها بشوية كلمونا وقالوا دوبهم فتحوا البوابة والإقلاع باقيله 10 دقايق ودوبها الناس بتدخل الطيارة بس خربوا اعصابنا حتى سلام الوداع ما قدرنا نسلم عليهم اففففف صربعونا صربعه حزنوا علينا علشان ما نبكي خخخخخخ امممممم امس كمان كان عيد ميلادي كل سنة وأنا طيبة ههههه صار عمري 26 خلصت 25 ودخلت ال

26
اليوم كمان عيد الفالنتان بس ما اعترف فيه

بقالة سما

من جد دي المرة بتكلم

لا احد يفكر يسافر بطيران سما ابدً

دائماً رحلاتهم تتأخر عن موعدها ولا يلغوا الرحلة قبل بنص ساعه ومايرجعوا الفلوس يا إنك تقبلي تروحي على الرحلة الجية بنفس ما دفعت
ويا لقيتي مكان يا مالقيتي اذا مالقيتي خلاص راحت عليك الفلوس والرحلة احجزي من جديد وكمان تدفعي خمسين ريال زياده اذا فاتتك الرحلة وتبي الرحلة الي بعدها

اخوية واخواتي امس رحلتهم 12 وثلث الضهر اقلعت الطيارة قبل الموعد بنص ساعه وهم خلاص بتفتشوا وراحت عليهم وقالولهم تدفعوا 50 ريال للرحلة الجية واستنوا الرحلة الي بعدها طلع ما في مكان واستنوا الرحلة الي بعدها قالولهم خلاص مافي في رحلة الساعه 11 بالليل اذا تبوا تحجزوا عليها فيه مكان وحجزوا عليها
دحين تكلمني اختي قالولهم كمان اتأخرت الرحلة ل 12 ونص الليل
اش دا حرام عليهم ناس معاهم اطفال وكبار من الصبح لغاية نص الليل تأخير
وقريت كمان في النت انه اذا كنت دافعه على الرحلة مبلغ ام 200ريال وجا شخص ثاني يبا حجز ودفع 400 ريال وما كان في مكان ممكن يكنسلوا الي دافع 200 ويحطوا مكانه الي دافع 400 ويرسلوله مسج يقلولوا الغينا الرحلة نذاللللللللله
غير انهم لما يأخروا التأخير دا كله يقولوا روحوا كله من البوفيه على حسابنا تصريفة واش يطلع البوفيه عصير حار ولا سندويش جبنة ناشفة
نصيحة لااحد يفكر يروح من بقالة سما
حسبي الله عليهم

خاطرة

خواطر كتبتها بالأمس على مواقف مرت علي وعلى غيري
لا اقصد بها احداً بعينه بل هي نظرات استقيتها ممن حولي ومن ذاتي وسكبتها حروفاً مبعثرة بين حنايا اوراقي(قصدي بلقي)

هناك من تراهم من بعيد كانوا في زمن من الأزمان مع احباب لكن الظروف والأسباب جعلتهم اغراب
تراهم من بعيد وتود ان تسلم عليهم
ما اكثر لحظات الفرح التي تشاركناها وما اكثر لحظات الحزن التي تقاسمناها
كتمت اسرارهم
وحاولت حل مشكلاتهم
لكن حصل ما حصل وتفرقتم
لم يعد لك نفس ان تسلم فتكتفي بالنظر من بعيد..
أناس تركناهم ولم نقل لهم ما بقلبناوتحسفنا بعد ان فارقوا دنيانا ..
أناس لهم ذكرى صداقة سنين عزيزة على قلوبنا وما زالت ذكراهم مضيئة ..
أناس قدمنا لهم كل عطاءنا لحبنا لهم فقابلونا بالامبالاة وعدم الإهتمام..
أناس اعطيناهم ثقتنا وخبئنا لديهم سرنا ثم استيقظنا نسمع احاديثاً عنا..
أناس احببناهم واحبونا لكن اكتشفنا انهم يريدون المرح معنا لانحن بذاتنا..
أناس يلقون علينا اللوم ويتركوننا مع آثار كلماتهم ويذهبون يتابعون حياتك بكل بساطة ولا يلتفتوا حتى ليروا ماسببت كلماتهم تلك من شروخ ..
لحظات تمر يغضب فيها اشخاص منك على افعال غير مقصودة
ولحظات تغضب فيها انت على امور تراها في الغد انها ما تستاهل
ولحظات يكون العتاب جارح..ولحظات لانرى فيها انفسنا
لحظات ..تكتب نفسها على سطور حياتنا
ولحظات تدفن نفسها قبل ان تولد

جرح

مدري اش اكتب اليوم في بوستي قعدت كتير ما كتبت وبرضه مني عارفة اش اكتب مممممم بما اني مني عارفة اش اكتب راح اقلكم سالفه سخيفة صارتلي اليوم كنت بقطع الجزر والبطاطس وبسوي نفسي فالحه وقفت الجزرة وبقطعها من النص بالطول وهي واقفه ودخلت السكينة بالنص واقطع والا ما شوف الا جلدة يدي في السكينة حتى الدم ما طلع على طول وفي النهاية الجزرة راحت عليها ولا اتقطعت بالنص هههههه وانا من الفجعه لما شفت شريحة من جلده اصباعي ماستوعبت طالعت في اصباعي لقيت مكان ما انشال الجلد فيه جلد ابيض تحته يعععععع رحت غسلت يدي وطهرت اصباعي بمسحة طبية وبعدها بدأ الدم والألم ويدي نصها تعورني آآآآي يا اصباعي بس كويس ماقطعت شي كبير

يوم بدون نت

كان النت عطلان يوم كامل طفش بدون النت هو الوحيد الي اقدر اتسلى عليه لما يكونوا الأولاد صاحيين
اليوم نزل علي النوم مدروخة بس احس بالنعاس ودحين في غبرة اكره جو الغبرة مرة احسه يدخل في رئتي غصبا عني وانا نايمة واقوم اكحكح مالي خلق انام في دا الجو
قعدنا انا والأولاد نلون في دفتر التلوين وعبودي طفش كالعاده اقله تعال كمل يقلي انا نونو ما اعرف الون هههههه
وشوية وشوية حتى رضي يلون شويتين وساب القلم وقعد يتفرج وانا اتحمست كملت باقي الصفحة والأماكن الي ما تلونت .

مع اني ما احب الحلى الكتير بس شكلي عندي نقص حلى اليوم مررة اشتهيت الشوكلاته واكلت الكاكو الي على شكل صدف خلصت العلبة كلها في 3 ايام رايحه جاية عليها حتى انا مستغربة من نفسي علبة الكتكات تقعد بالشهر والشهرين حتى تخلص (مو حامل)كمان ماسنجري ضرب مو راضي يشتغل نزلت الجديد اشتغل شويتين وخرب ودحين بنزل واحد تاني انشالله يزبط

نونو جديد

هذا ابن بنت خالتي عبد الله ماشالله عليه

وهذه حلاوة عبودي لنا يتربى بعزهم ان شالله ومبروك ما جاهم وحمد لله على سلامة أمه

لم تعد انت ولم أعد أنا

تجري الأيام سريعاً وتتبدل الأحوال وتتغير النفوس..لكن تبقى الطباع نعيش حالة نكران مع الذات حتى يأتي الشخص الذي يعلنها صراحة أمامنا ..ونشعر بالجرح والألم الذي تسببه نشعر بشتات الفكر وتخبط المشاعر والإنغلاق على انفسنا..نتمنى حينها ان نستطيع تغيير واقعنا لكن لابد من معايشته نحفر مقبرة ورودنا الذابلة ونرمي فيها وردة اخرى وندفنها بأيدينا "ياحافر قبري لا ترمي الصخر على صدري فإن هموم الدنيا اثقل من الصخور قصة الأمس الجميل وبقايا الحلم الأصيل بسمة الأمل الحائر من دروب المستحيل
(الأبيات الأخيرة منقولة بتصرف)

ماذا نريد وماذا ننتظر؟؟

أتأثرت بالكلام منقول من ايميلي
لا يوجد وقت للعيش بسعادة نحن نقنع أنفسنا بان حياتنا ستصبح أفضل بعد أن نتزوج نستقبل طفلنا الأول، او طفلا أخر بعده ومن ثم نصاب بالإحباط لان أطفالنا مازالوا صغارا، ونؤمن بان الأمور ستكون على مايرام بمجرد تقدم الأطفال بالسن ومن ثم نحبط مرة أخرى لان أطفالنا قد وصلوا فترة المراهقة الآن، ونبدأ بالاعتقاد بأننا سوف نرتاح فور انتهاء هذه الفترة من حياتهم . ومن ثم نخبر أنفسنا بأننا سوف نكون في حال أفضل عندما نحصل على سيارة جديدة، ورحلة سفر وأخيرا أن نتقاعد الحقيقة انه لايوجد وقت للعيش بسعادة أفضل من الآن فإن لم يكن الآن، فمتى إذاً؟ حياتك مملوءة دوما بالتحديات، ولذلك فمن الأفضل أن تقرر عيشها بسعادة اكبر على الرغم من كل التحديات كان دائما يبدو بان الحياة الحقيقية هي على وشك أن تبدأ ولكن في كل مرة كان هناك محنة يجب تجاوزها، عقبة في الطريق يجب عبورها، عمل يجب انجازه، دين يجب دفعه، ووقت يجب صرفه، كي تبدأ الحياة ولكني أخيرا بدأت أفهم بان هذه الأمور كانت هي الحياة . وجهة النظر هذه ساعدتني أن افهم لاحقا بأنه لا وجود للطريق نحو السعادة. السعادة هي بذاتها الطريق ... ولذلك فاستمتع بكل لحظة . لاتنتظر أن تنتهي المدرسة، كي تعود من المدرسة، أن يخف وزنك قليلا، او أن تزيد وزنك قليلا، أن تبدأ عملك الجديد، او أن تتزوج، أن تبلغ مساء الجمعة، أو صباح الأحد، أن تحصل على سيارة جديدة او على أثاث جديدة، أن يأتي الربيع أو الصيف أو الخريف أو الشتاء، أو تحل بداية الشهر أو منتصفه، أن يتم إذاعة أغنيتك على الراديو، أن تموت، أن تولد من جديد، كي تكون سعيدا السعادة هي رحلة وليست محطة تصلها لاوقت أفضل كي تكون سعيدا أكثر من الآن عش وتمتع باللحظة الحاضرة " القائل مجهول "

شنطة رخوة هههههه

دي آخر شنطة عملتها

بس فيها بعض العيوب اول شي الشنطة رخوة والمفروض تكون واقفة زي دي يبغالها مقوي اقوى

ثاني شي الخياطة حقت الأيادي المفروض انها توصل للطرف علشان توقف الشنطة وانا ما وصلتها دلاخة مني

ثالثاً :احتاج اسوي وحدة تانية علشان تزبط
المشكلة قطعها مرة كتير وخياطتها كتيرة اخدت مني شهر تقريبا بين جلسات متقطعه طبعاً كمان تاخد قماش كتير
هادا البترون

والمقاسات بالإنش

افكار للأطفال

حلوة الأفكار الي تحفز عقل الأطفال انهم يبتكروا هادا الشكل مدري اش اسمه عملته اختي اخت زوجي لأولادنا فكرته بسيطة بأوراق الجرايد ملفوفة ومثبتة بالدباسة ممكن كمان لللأطفال الأكبر يقدروا يلونوها وممكن تنعمل بأحجام واشكال هم يبتكروها خاصة انهم يقدروا يساعدوك في العمل والتركيب تشغلهم في شي مفيد وفي نفس الوقت ممتعه لك ولهم وأهم شي هي مشاركة بين الأم واطفالها كمان مثلاً فكرة المقص والصمغ والورق الملون نقدر نقص ونلصق معاهم اشكال وهم كل واحد يبتكر له شكل محدد حسب ما يبغا ماشالله اعرف وحده معلمة علوم ولدها وهو في الإبتدائي يعمل دائرة كهربائية لوحده الي بالبطارية والنور يعني ماشالله الأطفال عندهم طاقة وافكار وابتكارات بس يبغالنا نطلع من داخلهم ونوجهها التوجيه الصحيح

لقيت في النت كمان دي العلب تطبعيها وبس تركبيها تنفع تحطي في حاجات للأطفال في المناسبات زي الأعياد

It's raining day

The weather was raining today,it was gorgeous,i enjoyed sitting and listing to the sound of rain.
My kids love's the rain too,one of them took the umbrella and holded it with his small hand,i looked to his happy eyes while he was watching the rain,he was happy.
I'm blessed to be a mother, i know there is down side of every thing but we must look at to bright side right?
i took this picture before the rain

صباحكم فللللللللل

ما أكره الإزعاج في الصباح
ناس مزعجة بره وفوق تحت يالطيف طار النوم
زماااان كنت لما انام وتجي وحده من اخواتي تصحيني تقعد تزن على راسي تزن لين ما اعصب عليها واقوم معصبة ولا عنادا فيها اقوم بس ما فتح عيني خخخخخخ
ومرات بابا يصحيني على صلاة الفجر يمسك اصباع رجلي الكبير ويهزه بقووووة يعرفني اتنرفز لما يصحوني كده فأصحى اصلي ووجهي كده
كمان كنت مرات انام بدري وفي نص الليل اسمع في الغرفة ضحك وتريقة من اخواتي مدري على ايش ومرة انزعج من صوتهم فأقوم اصرخ عليهم يقوموا يضحكوا علي بأصوات مكتومة اقوم اعصب واحط المخده على راسي

ثم اتزوجت وكانت بداية الزواج الصحيان على كيفي هو الوقت الوحيد الي كنت اصحى فيه مبتسمة هههههه الى ان جو البزورة وما ادراك مالبزورة طبعاً
في البداية وهم صغار لاترتاحي ليل ولا نهار دحين كبروا الحمد لله الإزعاج في الصحيان يصحوا ويوقفوا عند راسي ماما حليب ماما حمام ماما تلفزيون اصحا وافطرهم واحطلهم الي يبوه وبرضه وجهي زي البسة الي فوق وحواجبي شوية تتضفر
موطفشانه منهم بس ماخدت كفايتي في النوم ولازم اقوم فتلاقيني اصحى واسوي كل شي بس بالوجه الغضبان
ابغا اصحا ووجهي مفرود هههههه بس معرف كيف ؟!!او على الأقل اصحا من غير ما اتحلطم
في ناس تصحى مبوزة من دون سبب وفي ناس تصحى مبوزة بسبب انا من النوع التاني يعني اليوم الي اولادي يسهروا ويناموا لوقت متأخر لعشرة مثلا ياسلااااااام الوجه مشرق والإبتسامة من هنا لهنا
اتنكد مرة اذا ما اخدت كفايتي من النوم بس هي مكتوبة علينا نحن الأمهات لغاية مانموت ونحن نكرف عشان اولادنا الله يقوينا ويحفظهم ويساعدنا نربيهم التربيه الصالحه

كل سنة وانتوا طيبين

مع البرد البرد البرد
جبنا للأولاد بجامات تدفي زكروني لما كانوا صغار الله يحميهم
سوري صورت وجيههم عجيبة شوية ماشالله مع حركتهم
وصلت درجة الحرارة اربعه برررررررررر
اسوأ شي في البرد الشعور بالخمول يجي غصبن عن الواحد
بالذات الشرشف وهو بارد
وكل سنة وانتم طيبين بمناسبة السنة الهجرية الجديده
مهما العمر يجري
ميلادي او هجري
يبقى غلاكم في دمي يجري
كل عام وانتم بخير
ان شالله سنة خير علينا وعليكم

جو ممطر

اتأخر البرد علينا السنة بس بعدين جانا برد محترم ودحين متقلب الجو شوية برد شوية عادي
ثم وأخيراً بعد كم صلاة استسقاء نزل المطر اليوم
الحمد لله ماشالله قعد يمطر من بداية الليل دحين 12 الليل ومازال فيه مطر
االله يجعلها مطر خير ورحمة

الأيام تمضي

اتفضلوا

قربت نهاية العام وبداية عام جديد انشالله تكون سنة خير وبركة على الجميع احداث كثيرة صارت سنة مرت بحلوها وبمرها لكن خلاص راحت نتعلم منها ومن أخطاءنا نتعلم من تجاربنا نتعلم من الناس الي حوليننا نشوف الصح وناخده ونشوف الغلط ونبعد عنه نسامح للي غلط علينا ونسامح نفسنا اذا قسينا عليها اولادنا اكيد مرات قصرنا معاهم نزيد نهتم فيهم نحسن علاقاتنا بأزواجنا ونتذكر الأيام الحلوة نتذكر أبهاتنا وأمهاتنا ونسأل عنهم ونساندهم بالكلمة الحلوة لما يكبروا وما يلاقوا من يسمعلهم وما نتذمر منهم نصفي قلوبنا ونفوسنا وما نشيل في قلوبنا لأننا نحن الي راح نتعب ونستهلك صحتنا وراحة بالنا على حاجات ما تستاهل ناخد الأمور ببساطة وما يحتاج نعقد الأمور بنفسنا نتأمل حياة غيرنا وناخد الأفكار الحلوة من هنا ومن هناك وممكن نبتكر بنفسنا نتروى قبل لا نحكم على غيرنا ونسمع من الطرفين حتى لو كان الموضوع واضح اذا انهرنا يووم من الأيام وكنا لوحدنا محد معانا نتذكر انه مع العسر يسرين وانه مافي شي يصير الا لحكمة وان الله هو المدبر احسن شي لما الواحد يعمل الطيب ومايفكر ينرد له ولا يزعل اذا ما انرد له انا جربت دا الشي مؤخراً وفعلاً شعور مريح ننظر حولنا نظرة عميقة ولوكان مايبين علي اني ما اتأمل الي بيصير حوليني لكني بشوف وبتعلم وبفكر وأتأمل كل يوم قبل لا أنام موشرط اشوف الغلط اسوي زيه بالعكس اعرف كيف اتجنب اطيح فيه واقدر النعمه الي عندي اكتر واكتر واشكر ربي اكتر واكتر واكتر لو الود ودي كان أتأملت اكتر بس النعاس يغلبني آخر شي المهم في السنة الجديدة انشالله نكون ارتقينا بأنفسنا أكثر من داخلنا ومن خارجنا ونحط لمراكبنا اشرعه نوازنها بنفسنا علشان لا تغرق وان كان دا الشي يتطلب مننا خطوات جريئة او كبيرة المهم انه يكون فيه تقدم كأني بربرت كتير كل سنة وانتم طيبين مقدماً وعام هجري سعيد علينا وعلى الأمة الإسلامية

أغنية الأيام الحلوة

دي اغنية قديمة امس جات على بالي كلماتها حلوة ما عرفت اش اكتب اليوم فقلت اكتب الكلمات
الأيام الحلوة بتعدي في ثواني
الأيام الحلوة مبترجعش تاني
طعم الحب تغيًر ,, وقت الفرح صغيًر
أكبر لحظة ود و حب و صدق زمنها قصيًر
الحلو بيتمرر ,, والجرح بيتكرر
نجرح نئلم نقسى ونظلم وغلطنا بيتبرر
اللي نحبه بنودعه ,, واللي في ايدنا بنضيعه
واللي ناسينا عايش فينا
واللي شارينا بنخدعه
ولا في الشدًه حبايب
ولا في الدمعه قرايب
كله في جرحك مرك دمك نارك ألمك غايب
حبل الود قسيًف
طعم الظلم يٍشيٍب
زمن الصدق وزمن الطيبة بئت حاجه بتتعيب
معنى الحب بنزيفه
صوت الحق بنكتفه
واللي ذبحنا ساكن روحنا
واللي جارحنا بننصفه
مشيه الدنيا ودايره فيها مراكب سايره
ناس في مراكب ضايعه ,, وناس في مراكب تايهه وحايره
ناس احزانها شديده
وناس سكتها بعيدة
ناس كل ما دمعتها بتذبل تطرح دمعة جديدة
في عز ألمنا وفي جرحنا بنتخلى عن بعضنا
وأد قصتنا أد حكايتنا
وأد دنيتنا أنت وانا

مكياج آخر زمن

صراحه مرة فلة دا المكياج خاصة للي ما يعرف في دمج الشادو زي حالتي
كمان ينفع لطلعات المستعجلة والطارئة بس انشالله ينباع عندنا

إلتقاط الصور

من ضمن الهوايات الي تعجبني واعملها التصوير

يعني مو مرررة فنانه بس تجي معايا مرات لقطات حلوة حبيت اشارككم بعضها

هادي صورة الحلوين قبل التهزيئ (صكوا فمكم)

وبعد التهزيئ

ههههههه

كل سنة وانتم طيبين

معليش اتأخرت عليكم تعرفوا العيد وانشغالاته
في مكة ماكنا نعتبر عيد الأضحى عيد عيد فعلياً لأنه اضحية ولحم وتقطيع وحفلة توزيع اللحم وتقسيمه فما نحس باليوم انه عيد خاصة كمان الحجاج فالدنيا زحمة في بعض المناطق القريبة من الحرم فما نطلع كتير
بس بالنسبة للشرقية ماشالله يعتبروه عيدا فعلا زي عيد الفطر وملابس جديده وهدايا وما إلى ذلك زي عيد الفطر

فكل سنة وعيد حج طيبين

ودول اولاد عيد الحج الي بيقولوا تشييييييز

كلمــــــــــــــــاتي

جميع ما سأكتبه هنا ليس شرطًا أن يكون متعلق بي ممكن تكون خواطر لرؤيتي لأناس آخرين او نظرة عابرة على موقف اوقفة متأمله على منظر حصل أمامي ::

أحياناً نقع ونحن في القمة
وأحياناً يكون الفشل طريقاً للقمة

يكون الترقب أسوأ احياناً من الحدث نفسه
الخوف من الناس يؤدي إلى العزلة

الصداقه عملة نادرة
عندما تكثر الخيبات تكون الألوان واحده
احياناً تكون الطيبة ضعف

لاأدري إلى متى يظل الإنسان حبيس كبرياءه؟!!
تكون السعاده مرات طيوراً مهاجرة

قد يلوم الإنسان غيره وينسى نفسه
الهدية المعنوية أقيم من هدايا مادية

اسمع من الطرفين ولا تحكم من طرف واحد
طيور الجنة يسحبون والدتهم إليها

أغلب الرجال لايحبون الرومانسية بل نحن
واغلب الرجال يريدون فلم وفشار وكرسي ليزي بوي

ودمتم سالمين

هدية

هادي هديتي من روزي بينك بمناسبة بوستها الميتين ربحت الجائزة
حلوة يعطيها العافية والريحه تجنن حقت الشور جل

تغييرات

لأول مرة نحلق للآولاد عند الحلاق عادة ابوهم يحلقلهم
عجبتهم التجربة عزوز انبسط وقعد تكلم مع الحلاق
وعبودي عجبه شويه الموضوع بعدين بوز علينا لما شغل السشوار عشان يشيل الشعر عنه بالهو وقعد يقول انا خواف ههههههه

وردة كروشيه

حبيت اصور الورده قبل لا افرطها عشان خلص علي الخيط قبل لا ابدأ في الحذاء التاني حق عبودي هادي الوردة عاجبتني تنفع نعمل منها كم حبة عشان نسوي مفرش بس تاخد صوف كتير للوردة الوحده ما ودي افرطها بس ما ابغا عبودي يحقد علي

هبقة كروشيه

احب اشكر حماتي على الفكرة
هي عملتها لأولادها وهم صغار وعجبتني الفكرة وعملتها لأولادي وعجبتهم
دي اول وحده اعملها باقيلي لسه لأخوه والفردة التانية

شوفوا

شوفوا كمان بستي
طبعاً مو حقيقية ولو اني اتمنى تصير حقيقية اتخيلوا يوم اصحى الاقيها بتمشي ههههههه امكن انفجع بس راح انبسط
هادي البسة مرة عاجبتني وكان نفسي اشتريها بس هناك عدة اسباب ماقدرت اشتريها اهمها غلاء السعر

طبعاُ دي بسة حقيقية ههههههه