لحاف همتارو

ياربي حتى الأطفال يدعوا عجبتني الصورة دي واحلى شي انو عرايسها معاها انا أحياناً كمان ادعي قبل لا أنام بس ما احط عروستي جنبي ههههههه الدعاء يريح النفس حتى لو كنت شايلة هم حاجه ما تحسي فكرك مشغول طول الوقت لأن الدعاء يريح القلب

أمس جبنا لعبودي لحاف جديد همتارو بدل الشرشف الي راحت عليه ومسكين انبسط مرة وراح بنفسه ينام لأنه اخوه جبناله لحاف جديد قبل فترة وهو لا لأنه لسه ما كان متعود على السرير حق الكبار شوفو كيف سحبه الصاله وانسدح عليه يتفرج فلم كرتون واخوه غار راح جاب لحافه هو كمان

where is 3zoz?

This is the first time my son sleep out side in grand ma house ,he love his uncle so match ,Abody missed hem ,he asked me where is azoz? with strange face,i missed hem too but i am relaxed a while sines long time a go but i am still wait hem to come back home .

لعب وجد ومرح

أمس جبت لأولادي ورق ملون عندي من اول ومقص بلاستيك وغرا وقصصتلهم اشكال واعطيتهم الغرا يلصقوا على كيفهم طبعاً كل واحد سوا على كيفه بس ماشالله عندهم حس فني زي امهم خخخخخخ بس عبودي مو عاجبه الوضع يعني لصق شوية ورجع يتفرج فلم كرتون بس قصقص شوية ورق .ودي أشكال عزوز

ودي اشكال عبودي

ودي أشكال ماما خخخخ اتحمست ولونت معاهم

الي على شكل كروت شفت زيهم في النت وحاولت اقلد الرسمة بس طلعت عفنه

يا نونس

شوفوا السلحفه كيف بتعتني بالبسة الصغرة الي مالها أم سبحان الله تنتبه عليهم كأنهم عيالها مدري بعدين اش صار فيهم هادي الصورة من سنة جدي قبل 4 سنوات

كوب نسكافيه

ريحة القهوة حلوة مع وقت الرواقه
يووووه احلى شي لما الأولاد يناموا الله يحفظهم والبيت يهدا واخلاقي التجارية تروق
وأقعد كده لحالي اسوي الي ابغاه من غير تعصيب ولا توتر
الصداع دابحني دي اليومين وبطني تشد علي كل ما عصبت حيضربلي لي عرق في النهاية
الله يعين بس

اول شنطة بشكل جديد

اولاً حبيت اشكر صديقتي روزي بينك الي الهمتني وشجعتني ما كنت متخيلة ابدأ نفسي اقدر اخيط زي شنطها وقلت اجرب وحده واخدت الطريقة وحمد لله زبطت معايا بس مش حنافسها هنا في السوق خخخخ المهم هادي الشنطة اثناء العمل

ودي بعد الإنتهاء من العمل

بحرررررررر

من زماااااان مرة عن البحر أمس رحنا البحر عشان عزوز مرة نفسه يشوف البحر المهم رحنا واشترينا صنادل البحر الملونه دي احلى حاجة فيها ألوانها حلوة وبلاستيك ومفتوحة من الجوانب وتنغسل وتنظف بكل سهولة (أحس اني قاعده اسوي دعاية(

المنظر الغريب بالنسبة لي ولأول مرة أشوفه على الطبيعه الجلي فيش شفته في الصور بس اول مرة اشوفه على الطبيعه وكان شكله كبير فلفت نظري ومسكته سحبته على المويه وصورته بعدين طلع ميت وانا خايفة منه خخخخخ كويس ما مسكته من المكان الي يلسع.



وأكيد منظر الغروب كان جميل

أيام الإمارات

هادا المنظر الرهييب كنت اشوفه من شباك بيتي في الإمارات بيتنا قدام المينا علشان كده فيه سفن دايماً قدا ما اقعد اتفرج ما اطفش بالذات الصباح او الغروب ومرات في الليل عاد في الليل اتفرج واضحك لأنه الشارع فيه مطبة كبيرة وما ادري ليه الناس ما يشوفوها فتلاقيهم يجووا مسرعين ومع المطبة تقلع سياراتهم كأنها سيارات لعبة وهي بتطير

هادا المكان في دبي بس حلو

هادي سفن المينا

ودي صورة بداية المدخل حق متحف دبي

طبعاً أيامها كنا نطلع اكتر لأنه لساعنا في شهر العسل وما في أطفال فكانت رواقه بس حمد لله كانت ايام حلوة

نونو

أمس رحت عند مرة صاحب زوجي ولدت وجابت ولد ماشالله يجنننننننننن بس مقهورة مرة ما صورته هي الأم من الجنوب والأب ولد عمها بس امه هولندية فطلع المكس في النونو ماشالله حلو وشعره رايح على شقار..الله يحفظه لهم وماشالله عزوز وعبود سوو الواجب اكلوا وشربوا وبعد ما خلصوا قالوا يالله نروح السوق هههههه

وديناهم تويز ار اص اشتروا اصغر سيارة ووووحلاوة قنوعين ماشالله عليهم

سربرااااايز

هو مو سربرايز فعلاً خخخخخ

خلصت فستان جنى أخيييييييييراً وطلع حلو ماشالله
حبيت اسوي كم بس ما عرفتله
الله يبلغني والبسها هو بنفسي تعبني شوية في حركة الوسط الطرف البارز بس النتيجه عجبتني شكراً روزي بينك على البييييه

فستان جميل

عجبني الفستان مرة روعه ونفسي اتعلم خياطته لأنه شكلها صعبة خاصة فيه كشكشة وقصة برنسيس يبغالهم اتقااان
هادا بترونه شفته في موقع عربي للخياطة بس بصراحه مني مستوعبة شكل البترون

بجامة

أدري غميتكم معايا بمواضيعي البائسة علشان كده جبتلكم اليوم شي مفرح
اول شي هالو كيتي فستان ظريف وخفيف للحر

ثاني شي بجامه جابها لي زوجي لي مرسوم عليها فيل ويقول هادي عشانك تنامي زي الفيلة خخخخخخ

أدعية إزالة الكرب

في دعاء مرة حلو من كلميتين يريح القلب من جد
لا حول ولا قوة الا بالله ولا منجى من الله الا إليه

من أيس من حياته عن عائشة رضي الله عنها قالت:سمعت النبي صلى الله عليه وسلم وهو مستند إلي يقول:" اللهم اغفر لي وارحمني ، وألحقني بالرفيق الأعلى" متفق عليه

إلا أذهب الله حزنه وهمه وأبدله مكانه فرحاً


كان رسول الله صلى الله عليه وسلم يكثر من هذا الدعاء اللهم إني أعوذ بك من الهم والحزن، والعجز والكسل والبخل والجبن ، وضلع الدين وغلبة الرجال

دعاء الكرب
لاإله إلا الله العظيم الحليم ، لاإله إلا الله رب العرش العظيم ، لاإله إلا الله رب السموات ورب العرش الكريم ". ( متفق عليه ) قال صلى الله عليه وسلم دعاء المكروب :" اللهم رحمتك أرجو فلا تكلني إلى نفسي طرفة عين ِ وأصلح لي شأني كله لاإله إلا أنت ". " الله ، الله ربي لاأشرك به شيئاً

للهم إنى أشكو إليك ضعف قوتى و قلة حيلتى و هوانى على الناس يا أرحم الراحمين يا أرحم الراحمين يا أرحم الراحمين أنت ربى و رب المستضعفين إلى من تكلنى إلى بعيد يتجهمنى أم إلى عدو ملكته أمرى,إن لم يكن بك على غضب فلا أبالى و لكن عافيتك هى أوسع لى,أعوذ بنور وجهك الذى أشرقت به الظلمات وصلح عليها أمر الدنيا و الآخرة من أن تنزل بى غضبك أو يحل على سخطك(ولك العتبى حتى ترضى) 3 مرات....ولا حول و لا قوة إلا بالله العلى العظيم

لا اله الا انت سبحانك اني كنت من الظالمين ، أسألك ......"

" الله ربي لا أشرك به شيئا"+" لا حول ولا قوة الا بالله

ياحي ياقيوم برحمتك أستغيث أصلح لي شأني كله ولاتكلني الى نفسي طرفة عين"

أفكار

افكار حلوة عجبتني هادي علبة الممناشف اصلاً حقت اليمون ممكن تلونيها باللون الي تحبيه حسب حمامك وتضيفي اكسسوارات من عندك وبعدها ما عليك الا انك تحطي المناشف

هادي فكرة تستفيدي منها من علب البرنقلز الفاضية لو ضع المستندات او حاجة تانية بس غلفيها وزينيها

أقمشة أقمشة أقمشة

واو ماشالله شوفوا كمية الأقمشة لوحده من الخياطات الوانها حلوة وكتييييييييييييرة ما تحتاج تنزل السوق كتير
والله مدري امكن من النوع الي كل ما تنزل تشتري لأنها تبيع بكميات كبيرة في محلها
دايماً عيوني تحول لما اشوف اقمشة كتير تعجبني وفي نفس الوقت كم شي يعجبني واحتار اش اختار بس في النهاية اطلع بقماش حلو
أمس أخيراً أشتريت القماش الي بسويه لجنى وان شالله ابدأ فيه حبة حبة علشان يزبط ان شالله معايا
بس مح أوريكم القماش دحين لغاية ما اخلص

يوم من الأيام

هادي زرعتي كبرت ماشالله واحلوت كل يوم اراقبها واتفرج عليها عبارتي طلعت:الحرية سر الإبداع: هي فين الحرية دي دا كان زمان؟
كيف لو الواحد يخرج من حياته ويراقبها يشوف نفسه اش سوت واش ما سوت يشوف الدنيا حوليه كيف ؟ويشوف قلوب الناس
سمحت لنفسي ابكي خمسة دقايق في اليوم علشان اقدر امارس نشاط بقية اليوم بدون ثقل
القلب محد يعلم فيه غير الله واش فيه واش يتحمل؟ممكن نشوف الناس اشكالهم عادية وممكن يكونوا دمهم خفيف او تحسهم اسعد ناس في الدنيا وهم داخلهم كل الحزن والتعاسة
يا لأنه محد عبرهم أو اتعاملوا معاملة سئية خلتهم بقلبوا حياتهم لشي مضحك فياخدوا كل شي بضحك وتريقة أو لأنهم فضلوا تجنب وجع الراس بس مو شرط انه يكون حزنهم دائم وممكن يكون للبعض دائم
يعني الواحد ممكن يتمتع بحياته ويمارس كل النشاطات بس الي في القلب محد يشوفه غير الله ويبقى في القلب
أعظم شي الشكوى لله هو الي يطمن القلوب وهو الي يسمع عبده ويقدر بالدعاء يطلع الي في قلبه بدون خوف بدون قلق بدون مشاكل
أتمنى من الله انه يزيل ويفرج عن قلب كل محزون

فستان البروفه

حابة مرة اعمل لجنى بنتي وبنت اختي فستان من عمل ايديا كهدية مني بس ماابغى اشتري قماش حلو واخربه فجربت على قماش عادي مستعمل وخيطت على يدي بس علشان اتخيل الشكل العام واش ممكن اضيف واسوي
رسمت البترون بقياساتها طبعاً هادي صورة الفستان التجريبية لا تاخدوا عليها هي بس شكل عام مو مزبط ولا دقيق وهادي اول مرة اعمل بروفة لفستان.. بس افود واحسن تعرفي اخطائك فين وتقدري تعدلي وتصلحي قبل لا تبدأي في القماش الأساسي خاصة إذا كان غالي
I want to make a dress to my daughter as a gift but i don't want to buy a beautiful fabric and screw it .so, i triad with a normal fabric and i stitched it with my hand just to imagine the look and what i can do more .
i drew the patroon last night and the picture up side was a profa dress, this is a first time that i make profa dress
but it's better for you to know where is the mistake before publishing the dress

التجربة الرهيييبة

تتزكروا النسكافيه الي بالمارس؟
الي قلتلكم عليها قبل كم بوست
جربتها أخيراً بس......هههههه
اول شي دبيت ملعقتين نسكافيه قد راسي فصارت ثقيلة شوية بعدين المارس زوجي أكل نصه من الحجم الوسط وانا ما عندي الحجم الصغير الي قالوا عليه فحطيت النص التاني على اساس انه صار حجمه صغير خخخخ
وثالثاً :لما شربت اول جغمة حسيتها ممرة شوية قمت اضفت عليها حليب مركز قامت صارت مرة حاااااااااااالية وانا وشي اشكال وألواان وانا اشرب كأنه احد غاصبني المهم جبت العيد وخامساً :الي هو الأدهى والأمران القهوة العربي تسهرني فما بالكم بالنسكافيه الثقيلة قعدت الين خمسة ونص الصباح وعيوني قد الريال مو راضية تغمض
ووووبس هادي قصتي اليوم

كثيراً ما يكون الصمت أكثر تعبيراً من صرخات القول

عندما تخطب الفتاة ويطلب منها الجواب يكون الصمت رضا
وعندمايكون الكلام يؤذي المشاعر يكون الصمت أبلغ
عندما لاتقتنع بكلام الشخص الذي أمامك خاصة الأكبر سناً يكون الصمت احتراماً
عندما يتجاهلك عزيز ليلتفت إلى اولويات أخرى يكون الصمت ألماً
عندما يجرحك شخص وتذهب لتبكي بمفردك يكون الصمت قهراً
عندما تشعر بأن قلبك اصبح ضعيفاً لايحتمل الألم يكون الصمت خنقاً
عندما يتلفظ الذي أمامك بكلمات جارحة يكون الصمت قوة
عندما تشعر بالحزن يعتصرك ولا تستطيع البوح به لأقرب الناس إلى قلبك لأنك تعلم أنك ممنوع من ذكر السبب حينها يكون الصمت معاناة

صبحكم بالخير يالعمال العمالية

مدري اذا تعرفوها ولا لا؟كنا ونحن صغار مع بنات خالاتي نلعب ألعاب عجيبة مدري من فين جات ولا مين قلنا عليها وكنا نحب دي اللعبة نتصف فريقين قبال بعض كأننا في عرضة وناحية تقول:صبحكم بالخير يالعمال العمالية
والفريق التاني يقول:جينا نخطب بنتكم الحلوة الجميلة
الأول:مانعطيكم هيا الا بألف ومية
الثاني:نجي على دياركم ونكسر أبوابكم وهادي عروستنا
ونضل نلعبها لين يخلصوا البنات العرايس وآخر وحده تبقى العزوبية خخخخخخ
وكنا في بيت سيدي الله يرحمه نلعب في المجلس الكبير نخلي المراتب هي اليابسة والأرض هي البحر ونقسم نفسها نصين نص على البر ونص على البحر والي على البر يحاولوا يعدواللناحية التانية من غير ما يمسكوهم التماسيح إلي هم الأولاد ويطيحونا في الموية وشوفوا المضاربة والترفيس عشان لا نطيح في الموية الوهمية
مدري اش ذكرني اليوم بيهم بس والله نخترع ألعاب وننبسط مو زي أولاد دحين بلاستيشن كورة,كورة بلايستيشن

اللازانيا الي شهيتكم عليها

على قد ما شهيتكم على اللازانيا ..في النهاية ما دقتوها
قمت قلت خليني اصورها لكم بس ما اتزكرت الا ونحن مخلصين نص الصينية خخخخخ قمت بسرعه صورتها وهي على السفرة علشان كده الصورة مو قد كده بس ولا يهمكوا كل واحد ياخد حتة ويا كل بالعافية عليكمطريقتي في العمل
مفرومة صحن حق المخازن تحطيها في طاوة على النار ولمن تبدأ تطلع مويتها حطي عليها صلصة أنا اشتريت صلصلة للتجربة وطلعت رهيييييبة هي صلصة مكرونة بالمشروم والزيتون تاخدي كم ملعقة منها وتحطي على المقرومة وشوية بهارات ايطاليه وملح وفلفل اسود بحيث المفرومة تصير زي كأنها صلصلة
تسلقي اللزانيا واظن انه احسن تحطيليها زيت علشان ما تلصق لأني ما حطيت ولصقت واحتست فيها
الباشيميل:3ملاعق دقيق كاستين ونص حليب نيدو محلول بيضة
جبنة مازوريلا
الطبقات:لازانيا *مفرومة* جبنة* باشميل
ناس يسووها 4 طبقات وناس 3
أنا سويتها طبقتين الطبقة الأخيرة باشميل
يالله يا اودة خدي الطريقة واديني طريقة الباشميل الطعمة حقتك

كوكتـــــــــــــيل

صباحكم عسل أقصد كوكتيل ههههه اتفضلوا معايا

مدري اش اسوي غدا مشتهية لازانيا بس شكلي حسويها لأنه كنت بسويها يوم الجمعه بس حيجيبوا أكل من بره فحسويها اليوم ان شالله . صحيت اليوم على أصوات عجيبة تكترات وحاجات تنرمي بعدين طالعت من الشباك لقيت جارنا جايب تركتر وبخلع الشجر حقه وكمان شجر الجارة الي تحتنا ...زعلت مرة على الشجر ما احب احد يخلع الشجرة من جذورها صار شارعنا صحراء ..

على فكرة يقولوا بكرة في إعصار حيضرب الخليج حيجي على جنوب باكستان وبعدين عمان وبعدين علينا سرعته في الخليج 20 عقدة في الساعه وارتفاع الموج 2 ونص متر الله يستر ويحفظنا ويحفظنا أولادنا وأزواجنا وأهلنا من كل مكروه.

what a kind of flower are you? i love roses and daisies .The flower is fun to look at it looks beautiful.
some times i need clean air, perfect moon, rosy road but this is not real it is in my dreams
i know nothing is perfect any where ,i am not perfect either and I am not asking for a perfect life alhamdo lela I am happy about What my God gives me but some times I want to relax, I need to feel appreciated but
in another way, a way that makes me really happy like i want to feel

what ever..?

كل ٍله الله..محد يموت يا صاحبي قبل يومه

ما أقسى الشعور بالوحده بالرغم من وجود الكثيرين من حولك وماأصعب أن يكون الإنسان الوحيد الذي يفهمك بعيد عنك
رغم البعد والشتات
والوحده والمعاناة
سنظل أخوات

النت مزفت والصور ما تطلع

كل مرة نطلع السيارة عزوز يتفرج اسبنج بوب ولما نوصل البيت ما يرضى ينزل لين يكمل الحلقة فأنزل أنا وعبودي ونطلع البيت وزوجي يقعد مع عزوز أفندي لغاية ما تخلص الحلقة

هادي آخر شنطة عملتها شكلها عادي بس قماشها على الموضة:)